Իսրայելական Mig News-ի փոխանցմամբ՝ հոկտեմբերի 1-ին ամերիկյան Noble Energy ընկերությունը պլանավորում է հորատման աշխատանքներ սկսել «Բլոկ-12» գազային հանքավայրում, որը գտնվում է Իսրայելի ու Կիպրոսի բացառապես տնտեսական գոտում։
«Բլոկ-12» գազային հանքավայրը գտնվում է իսրայելական «Լևիաֆան» գազային հանքավայրից հյուսիս ընկած տարածքում, որը համարվում է վերջին տասնամյակում բացված ամենախոշոր գազային հանքավայրը։ «Հըզբոլլահ»-ը հայտարարել է, որ «Լևիաֆան»-ը գտնվում է լիբանանյան տարածքային ջրերում։
Այս կապակցությամբ թուրք պետնախարար, Էգեմեն Բաղըշը հանդես է եկել Կիպրոսի հանդեպ ակնհայտ սպառնալիքներով։ Նա հայտարարել է, որ եթե «Բլոկ-12»-ում հորատում սկսվի, Թուրքիան դրան ռազմական պատասխան կտա. «Դա պատճառ է, որ մեր ռազմանավերը տեղակայվեն տվյալ տարածաշրջանում։ Հենց դրա համար ենք մենք ստեղծել հզոր բանակ և հենց դրա համար ենք մարզում մեր զինվորներին։ Նրանք չեն կարող հորատում անցկացնել այն վայրում, որը չի պատկանում իրենց»։
Հիշեցնենք, որ ավելի վաղ Թուրքիայի ԱԳՆ-ի բարձրաստիճան պաշտոնյաներից մեկը հայտարարել էր, որ այսուհետ Միջերկրական ծովի արևելյան հատվածը չի հանդիսանալու քաղաքացիական նավերին սպառնացող իսրայելական ռազմածովային ուժերի զորավարժության հրապարակ.
«Թուրքիայի ռազմածովային ուժերն ուժեղացնելու են Միջերկրական ծովում իրենց ակտիվությունը և պարեկություն են իրականացնելու միջազգային ջրերում։ Մենք առավել ագրեսիվ ենք գործելու։ Իսրայելն այլևս չի կարող ազատորեն սպառնալ։ Թուրքական նավատորմը ներառվում է Միջերկրական ծովի արևելյան հատվածի գազի պայքարում։
Թուրքիայի ռազմածովային ուժերը մտադիր են ուղեկցել Կիպրոսի ու Իսրայելի միջև ընկած տարածքում դեպի Գազայի հատված ուղևորվող և հումանիտար բեռ փոխադրող նավերին։ Այսուհետ թուրքական ռազմանավերն ավելի կնկատվեն տարածաշրջանում»։
Ի դեպ, երբ նախորդ տարվա դեկտեմբերին Իսրայելն ու Կիպրոսը պայմանագիր կնքեցին սահմանային ջրերում նավթի ու գազի որոնման և արդյունահանման շուրջ, դա հարուցեց Թուրքիայի խոր դժգոհությունը: Պարզաբանումներ տալու նպատակով անմիջապես թուրքական արտգործնախարարություն կանչվեց Անկարայում Իսրայելի դեսպան Գաբի Լևին:
Թուրքիայի փոխարտգործնախարար Ֆերիդուն Սինիրլիօղլուն հայտարարեց, թե այդ պայմանագիրն իրենք դիտարկում են որպես Թուրքիայի տարածաշրջանային շահերին դիպչող դավադրություն, և իսրայելական կողմից պահանջեց չեղյալ հայտարարել այն: Սակայն իսրայելական կողմը չընկրկեց և մերժեց թուրքական պահանջը` դա որակելով պարզապես լկտիություն, քանի որ իրենք նախատեսել են նավթի ու գազի որոնողական աշխատանքներ տանել ոչ թե Հյուսիսային Կիպրոսի ու Թուրքիայի միջև ընկած ջրատարածքում, այլ` (Հարավային) Կիպրոսի ու Իսրայելի միջև ընկած ջրատարածքում:
