Ալեքսանդր Թամանյանի ծննդյան օրվա առթիվ մարտի 16-ին Քաղաքաշինության կոմիտեի նախագահ Արմեն Ղուլարյանը, Հայաստանի ճարտարապետների պալատի նախագահ Ալեքսանդր Բադալյանը, Շինարարների միության նախագահ Գագիկ Գալստյանը քաղաքաշինության բնագավառի ներկայացուցիչների հետ այցելել են Կոմիտասի անվան պանթեոն՝ հարգանքի տուրք մատուցելու մեծանուն ճարտարապետի հիշատակին:
Ինչպես տեղեկացրին ՀՀ քաղաքաշինության կոմիտեից, ծննդյան 145-ամյակի առթիվ վերստին արժևորելով հայկական ազգային ճարտարապետության մեջ թամանյանական ինքնատիպ ձեռագիրը՝ կարևորվել է նրա ավանդը մի ամբողջ ուղղության՝ թամանյանական դպրոցի ձևավորման գործում: Ըստ աղբյուրի՝ Թամանյանի հանճարը դրսևորվել է թերևս նրա բոլոր աշխատանքներում. նա նոր բովանդակություն է հաղորդել հայկական ճարտարապետությանը:
«Երբ հայ ճարտարապետության խոշորագույն հետազոտող Թորոս Թորամանյանը մահամերձ էր, կյանքի վերջին օրը նրան այցելում է Ալ. Թամանյանը: Թ. Թորամանյանը խնդրում է, որ իրեն օգնեն նստել, քանի որ չի կարող պառկած մնալ, երբ Վարպետն է եկել»,- Թամանյանի մեծությունը փաստող մի դրվագ մեջբերեց Քաղաքաշինության կոմիտեի Ալ. Թամանյանի անվան ճարտարապետության ազգային թանգարանի տնօրեն Մարկ Գրիգորյանը:
Նշվում է, որ ներկաները ծաղիկներ են խոնարհել նաև ճարտարապետներ Թորոս Թորամանյանի, Ջիմ Թորոսյանի և այլոց շիրիմներին: