Թուրքագետ Ռուբեն Մելքոնյանը, խոսելով թուրք-իսրայելական հարաբերություններում վերջին զարգացումներից, նշեց, որ դրանց ամենազարգացած մակարդակում ռազմական համագործակցությունն է, և Թուրքիայի վերջին քայլը, որով նա սառեցրեց ռազմական պայմանագրերը, թույլ են տալիս պնդել, որ դա լրջագույն ձևով կփոխի թուրք-իսրայելական ներկա հարաբերությունները:
Թուրքագետը այս քայլը որակեց մեծ զոհողություն՝ Թուրքիայի կողմից և նշեց, որ ենթադրվում է՝ թուրքական քաղաքական մեքենան հաշվարկել է բոլոր հետևանքները, և այն պետք է անպայմանորեն արդարացված լինի Թուրքիայի համար: Խոսելով Թուրքիայի այս ակտիվ քայլերի հեռահար նպատակներից՝ Մելքոնյանը նշեց, որ հիմնականը Մերձավոր Արևելքում իսլամական աշխարհում Թուրքիայի` անվիճելի առաջատար դառնալու հավակնություններն են. «և հաշվի առնելով, որ իսլամական աշխարհում բավական ակտիվ են հակահրեական տրամադրությունները, և Թուրքիայի այս քայլի հետևանքով նրա հեղինակությունը շեշտակի կերպով ավելանալու է իսլամական աշխարհում, կարելի է ենթադրել Թուրքիայի արած քայլերի հեռահար նպատակը»:
Անդրադառնալով Թուրքիայի կողմից այս ամբողջ ընթացքում արված հայտարարություններից երկուսին՝ թուրքագետը նշեց. «Առաջինը` Թուրքիան Իսրայելից պահանջեց ներողություն խնդրել այն մի քանի զոհերի համար, ովքեր եղել են նավի վրա: Սա պահանջում է Թուրքիան, որը ավելի քան 90 տարի հրաժարվում է ներողություն խնդրել 1,5 միլիոն զոհերի համար:
Երկրորդ` Թուրքիան պահանջեց, որ աշխարհում անօրինական ճանաչվի գազայի հատվածի շրջափակումը Իսրայելի կողմից: Սա պահանջում է մի երկիր, որը շուրջ երկու տասնամյակ անօրինական կերպով շրջափակել է Հայաստանը»:
Խոսելով պատասխան քայլերի մասին՝ նա նշեց, որ ամենահավանական քայլը կլինի այն, որ Իսրայելը կակտիվացնի իր քայլերը Ցեղասպանության ճանաչման հարցում, «որոշ պետություններ Հայոց ցեղասպանության ճանաչումը փորձում են օգտագործել քաղաքական նպատակներով, սակայն այդ քայլը պետությունների կողմից չի կարելի դիտել իբրև անկեղծ ճանաչում, և ոչ մի պետություն իրավունք չունի շահարկելու Հայոց ցեղասպանության հարցը»:
