ԱՄՆ պետքարտուղարության ներկայացուցիչ Նեդ Փրայսը հայտարարել է, թե Վաշինգտոնը ենթադրում է, որ ամերիկյան անօդաչուի անկման հասցրած՝ Ռուսաստանի ռազմական օդանավի գործողությունները չեն եղել կանխամտածված: Մարտի 15-ին տարածվեց տեղեկություն, որ ՌԴ Սու 27 ռազմական օդանավը Սև ծովում խոցել է ամերիկյան անօդաչու: Ռուսաստանի ՊՆ-ը հաստատեց, որ ռազմական օդանավը «որսացել» է անօդաչու՝ Ղրիմի մերձակայքում, սակայն որևէ կերպ չի խոցել, իսկ անօդաչուն ընկել է ջուրը, քանի որ կատարել է անհաջող մանևր: Այս իրադարձությունը Հայաստանի կամ Կովկասի «հեռվից» կարծես թե չի առաջացնում անմիջական հետաքրքրություն, մինչդեռ տեղի ունեցողը թերևս հիմնարար նշանակության հանգամանք է: Փաստացի, առաջին անգամ տեղի է ունենում ամերիկա-ռուսական բաց բախում:
Ամերիկյան կողմը հայտարարում է, որ ռուսական ռազմական օդանավը «պատահաբար» դիպել է անօդաչուին, չի եղել կանխամտածված խոցում: Ամբողջ հարցն այն է, որ կանխամտածված խոցման վարկածն առաջ տանելու դեպքում Վաշինգտոնը պետք է կատարեր դրանից բխող համարժեք գործողություններ, ինչը էլ ավելի կխորացներ անմիջական բախման հանգամանքը: Միևնույն ժամանակ, այս իրադարձությունը պետք է դիտարկել նաև օրեր առաջ ի հայտ եկած տեղեկատվության ֆոնին, որ Հյուսիսային հոսք գազատարի պայթյունը ԱՄՆ հատուկ գործողություն է: Տեղեկությունը տարածել էր ամերիկացի հեղինակավոր հրապարակախոսներից մեկը, Պուլիտցերյան մրցանակի դափնեկիր, հետազոտող լրագրող Սեյմուր Հերշը:
Վաշինգտոնը հերքեց դա, թեև Հերշը պնդում էր իր հետաքննությունը: Օրեր անց ամերիկյան մամուլում տեղեկություն եղավ, թե գազամուղի պայթյունը իրականացրել են ուկրաինացիները: Ռուսաստանը հայտարարեց, որ ԱՄՆ այդ տեղեկությունը բաց է թողնում պատասխանատվությունը իրենից հեռացնելու, շեղելու համար, բայց իրենք հասնելու են միջազգային հետաքննության: Եվ ահա, այդ ֆոնին, երբ Մոսկվան մեղադրում է Նահանգներին իր սեփականության դեմ դիվերսիոն ոտնձգության համար, տեղի է ունենում սևծովյան միջադեպը, երբ ռուսական օդանավի հանդիման դուրս եկած ամերիկյան հետախուզական անօդաչուն ընկնում է ծովը: Սա իր մասշտաբով ոչ մեծ, բայց իր քաղաքական բովանդակությամբ բավականին տարողունակ իողություն է, որը վկայում է ամերիկա-ռուսական «ճակատում» էսկալացիայի շոշափելի աճի էական ռիսկերի մասին:
Այդ ֆոնին էլ վարչապետի մակարդակով Երևանը բարձրաձայնում Կովկասում էսկալացիայի բարձր ռիսկի մասին: Ընդ որում, հարկ է ուշադրության արժանացնել երկու հանգամանք: Երևանն այդ մասին բարձրաձայնում է Փաշինյան-Պուտին հեռախոսազրույցից հետո, ինչպես նաև Վրաստանում հայտնի իրադարձություններից, որը Թբիլիսին գնահատել էր հեղաշրջման փորձ: Ըստ ամենայնի, Երևանում դիտարկվել է, որ Կովկասը «ճոճելու» վրացական ուղղությունը չստացվեց և չի բացառվել, որ կլինի հայ-ադբեջանական հակամարտությամբ ճոճելու փորձ:
