Մամուլի ազգային ակումբը Հայաստանի Հանրապետության անկախության 20-ամյակի կապակցությամբ նախաձեռնել է Հայաստանում հավատարմագրված օտարերկյա դեսպանների հանդիպումների շարք, որի առաջին հյուրն այսօր Հայաստանում Լեհաստանի արտակարգ և լիազոր դեսպան Զդիսլավ Ռաչինսկին էր:
Դեսպանը խոսեց` «Հայաստանը և Եվրոպան: Եվրամիությունը և տարածաշրջանը» թեմայի շրջանակներում:
Զդիսլավ Ռաչինսկին իր ելույթի նախաբանում նախ՝ հիշեցրեց, որ Լեհաստանի նախագահի Հայաստան այցի ընթացքում, որպես ԵՄ-ում նախագահող երկրի նախագահ, Կոմորովսկին նշեց, որ Լեհաստանն այն երկրներից է, որը կողմ է «բաց» Եվրամիության գաղափարին, ընդգծեց, թե Լեհաստանը ինչ բարդություններ է ապրել անկախությունից ի վեր: «Այդ ամենին կարելի է հասնել, եթե լավ երազել և հասնել ցանկացած երազանքի»,- ասաց դեսպանը` մատանանշելով իր երկիրը»:
«Արևելյան գործընկերության» գագաթնաժողովը, որը կկայանա սեպտեմբերի վերջին, ամփոփիչ կլինի, և այստեղ պատասխաններ կտրվեն` ու՞ր ենք հասել, ի՞նչ պետք է անել, այսինքն` ամեն ինչ կախված չէ միայն ԵՄ-ից, այլև` հենց երկրներից, հայտարարեց ՀՀ-ում Լեհաստանի դեսպանը` հավելելով, որ Սերժ Սարգսյանը հաստատել է իր մասնակցությունը գագաթնաժողովին:
Նա հույս հատնեց, որ գագաթնաժողովում մանդատ կձևավորվի՝ վիզային ռեժիմի դյուրացման գործընթացի համաձայնագրի համար: Իսկ ինչ վերաբերում է ազատ առևտրին, ապա դեսպանը նշեց, թե մենք` հայաստանցիներս էլ լավ գիտենք, թե ինչ խնդիրներ կան՝ նման ոլորտի իրականացման ճանապարհին:
Մադրիդում գործող FRIDE վերլուծական կենտրոնի փորձագետները վերջերս նշել էին, թե «արևելյան գործընկերությունում Լեհաստանը ամենաքիչը հետաքրքրված է Հայաստանով»:
Փորձագետների պնդմամբ՝ ամենաթույլ հետաքրքրությունը պաշտոնական Վարշավան տածում է դեպի Հայաստանը:
«Հետաքրքրվածության նման պակասի պատճառը Երևանի կողմնորոշումն է դեպի Ռուսաստանը և Հայաստանի` Եվրամիությանն անդամակցելու ուղղությամբ հավակնությունների բացակայությունը», – նշում են մասնագետները: Դեսպանը այս վերլուծությունը «հիմարություն» համարեց:
«Առաջին լրատվական»-ի հարցին, թե Լեհաստանի համար, այնուամենայնիվ, Հայաստանի` դեպի ՌԴ կողմնորոշումը և այն փաստը, որ ՀՀ իշխանությունները ԵՄ-ին անդամակցության վերաբերյալ հայտարարություն չեն անում` դա որևէ կերպ հաշվի՞ է առնվում Լեհաստանի կողմից, դեսպանը պատասխանեց, որ իր կարծիքն է ներկայացնելու, թեև նաև իր երկրում են այդպես կարծում։ «Մենք չենք դիտում Հայաստանը, որպես ՌԴ-ից սպառազինություն ստացող մի երկիր: Կրկնում եմ, աշխարհաքաղաքականություն փոխելու համար գաղափար չէ: Ինձ անկեղծ պատասխանեք` լրագրողների ազատության, հանրահավաքների ազատության ոտնահարման համար արդյո՞ք իրավախախտը պատժվում է՝ անկախ իր զբաղեցրած պաշտոնից: Եվ այն կազմկերպությունները, որոնք պայքարում են տարբեր արատների դեմ` նշանակություն ունի՞ իրենց կողմնորոշումները: Նրանք կամ լավ են աշխատում, կամ՝ վատ»,- նկատեց դեսպանը:
Անդրադառնալով ԼՂ կարգավորման գործընթացին՝ դեսպանը չհամաձայնեց այն տեսակետին, թե Ռուսաստանի դերակատարությունը գերակայում է կարգավորման գործընթացում, նա նկատեց, որ պարզապես ակտիվություն է այդ երկրի կողմից:
Ռաչինսկին կարևորևց ԵՄ-ում հատուկ նոր ներկայացուցչի նշանակումը, ով պետք է զբաղվի չկարգավորված հակամարտություններով: Նա նշեց, որ հակամարտության կարգավորման ֆորմատը` ԵԱՀԿ Մինսկի խումբը, չի փոխվի, սակայն ԵՄ-ն ավելի ակտիվ դերակատարություն կունենա գործընթացում, կմեծանա ազդեցությունը կարգավորման գործընթացում:
