«Ադրբեջանն ահաբեկչական երկիր է, Ղարաբաղում վերջին գործողությունները դրա վկայությունն են։ Ինձ համար, սակայն, խնդրահարույց է այն հանգամանքը, որ այնտեղ կանգնած են ռուսական խաղաղապահ ուժերը և համապատասխան գործողություններ չեն իրականացնում»,-«Առաջին լրատվական»-ի հետ զրույցում նման տեսակետ հայտնեց Հայաստանի Զինված ուժերի գլխավոր շտաբի նախկին պետ, գեներալ-լեյտենանտ Նորատ Տեր-Գրիգորյանցը։
Մեր զրուցակիցն ընդգծեց.«Կա հստակ պայմանավորվածություն, որի համաձայն՝ գետի մի ափում հայերն են, մյուսում՝ ադրբեջանցիները, իսկ հոսող գետը՝ ռուս խաղաղապահները։ Իրենք չպետք է թույլ տան հայերի ու ադրբեջանցիների միջև որևէ առճակատում։ Ահաբեկչական գործողություններ անընդհատ կարող են լինել, հնարավոր է՝ դրանք անգամ չնկատեն, իսկ եթե նկատում են ու համապատասխան գործողություններ չեն իրականացնում՝ շատ վատ է։ Իրենք իրենց առջև դրված խնդիրը լավ չգիտեն, խախտում են եռակողմ պայմանավորվածությունը, որը Հայաստանը, Ադրբեջանն ու Ռուսաստանը կնքել են 2020 թվականի նոյեմբերի 9-ին»,-ասաց նա։
Տեր-Գրիգորյանցը նաև նշում է՝ ռուս խաղաղապահները կրակելու իրավունք չունեն.«Կարելի է նրանց քննադատել, բայց միևնույն ժամանակ՝ իրենք մեղավոր չեն, քանի որ նման իրավունք չունեն։ Հարց է առաջանում՝ այդ դեպքում ինչու են կնքում պայմանագիր խաղաղապահների տեղակայման հետ կապված, երբ նրանք ընդամենը որպես պահակ են կանգնում ու որևէ բան չեն անում։ Ինչու՞ եք վիրավորում ռուս ժողովրդին ու այդ զինվորականներին, չէ՞ որ դա վիրավորանք է։ Մենք քննադատում ենք, ասում ենք՝ ռուս խաղաղապահները որևէ գործողություն չեն ձեռնարկել, բայց դա էլ արդար չէ, քանի որ նրանք իրավունք չունեն որևէ բան անել։ Ես քննադատել եմ նրանց նախկին ղեկավարին, իրենց պաշտոնից ազատեցին, այլ տեղ տեղափոխեցին, առաջխաղացում տվեցին իրեն… հիմա այլ հրամանատար է եկել, նորից նույն վիճակը։ Ստացվում է՝ իրենց առջև նման խնդիր չկա։ Կա՛մ անկառավարելի իրավիճակ է կա՛մ միտումնավոր է այդպես արվում»։
Գեներալ-լեյտենանտի խոսքերով՝ Ադրբեջանն անընդհատ սադրանքների է գնում, որ հայկական կողմից էլ պատասխան գործողություններ լինեն.«Այդ պարագայում կասի՝ տեսեք, հայերը հարձակվեցին։ Իսկ երբ նրանք են գործում, ամբողջ մամուլը, արևմտյան աշխարհը նրանց պաշտպանում է։Իսկ հենց հայկական կողմը պատասխանում է, միանգամից ստացվում է, թե մերոնք ագրեսիա են իրականացնում։ Ադրբեջանը սադրանքների միջոցով ուզում է Ռուսաստանի դեմ երկրորդ ճակատ բացել։ Ցանկացած սադրանք, ցանկացած պատերազմ, որ տանում են հայերի, Արցախի, Հայաստանի դեմ, դրանք սադրիչ գործողություններ են հենց ռուս ժողովրդի նկատմամբ։ Դա այն քաղաքականության շարունակությունն է, որ հիմա արևմտյան աշխարհը՝ ԱՄՆ-ի գլխավորությամբ իրականացնում է Ռուսաստանի դեմ՝ պատերազմելով Դոնբասում։Ինչպես թուրքերն են ատում հայերին, հույներին, այնպես էլ արևմտյան աշխարհն է ատում ռուս ժողովրդին։Ամեն տեղ, բոլոր կողմերից փորձում են հարվածել ռուսներին։ Ցավոք սրտի՝ նախևառաջ զոհաբերվում են այն բոլոր երկրները, որոնք շրջապատում են Ռուսաստանին։Տվյալ դեպքում՝ Հայաստանը։ Նրանք նույն բանն անում են նաև Բելառուսի դեմ»,-ասաց մեր զրուցակիցը։
Նորատ Տեր-Գրիգորյանցը կարծում է, որ Ալիևը կեղծավոր ձևով ժպտում է Պուտինին, բայց իրականում ինքը հենց ՆԱՏՕ է.«Թուրքիայի և Ադրբեջանի Զինված ուժերը գրեթե միասնական են։ Մամուլի տեղեկություններով՝ մոտ 500 թուրք ռազմական խորհրդականներ ունի Ադրբեջանը, ռազմական պատրաստությունն էլ ՆԱՏՕ-ի ծրագրով է տեղի ունենում։Այստեղ է նաև Իսրայելը,ով առհասարակ ամբողջ աշխարհի ամենամեծ սադրիչն է։ Իսրայելն էլ ներգրավել է այստեղ է՝ Իրանին հարվածելու համար։ Դրա համար էլ անօդաչուներ է տալիս Ադրբեջանին, «ես քեզ, դու ինձ» սկզբունքով։Ադրբեջանն էլ նրան տարածք է տալիս Իրանին հարվածելու, հետախուզություն անելու համար։ Մուսուլմանական երկիր Ադրբեջանը դավաճանում է մեկ այլ մուսուլմանական երկիր Իրանին։ Ահա այսպիսի դավաճանական, սադրիչ, ագրեսիվ պետություն է Ադրբեջանն ու իր ղեկավարությունը»։
Մեր զրուցակիցը համարում է, որ Հայաստանը պետք է ամեն ձևով բարձրաձայնի այն փաստը, որ եռակողմ համաձայնագիրը չի իրականացվում.«Հայաստանում հավանաբար կա այդ պայմանագրի իրականացման աշխատանքային խումբ։ Եթե չկա այդպիսի բան, ապա ինչու՞ չի ստեղծվում։ Թող գոնե Անվտանգության խորհրդի քարտուղարը, ով պատասխանատու է երկրի անվտանգության համար չի զեկուցում ՌԴ Անվտանգության խորհրդի քարտուղարին, Ադրբեջանի ԱԽ քարտուղարին, որ խախտվում է եռակողմ պայմանավորվածությունը։ Ինչու՞ չի ասում, որ Ադրբեջանը երկու ամսից ավել փակել է Լաչինի միջանցքը, անջատում է մեկ գազը, մեկ լույսը…Երկրորդ՝ մենք ունենք Հայաստանի դեսպան Ռուսաստանի Դաշնությունում։ Ինչու՞ պարոն դեսպանը որևէ ձայն չի հանում, ինքը որ գումար է ստանում, ինչ-որ բան առհասարակ անու՞մ է այստեղ, ինչու՞ չի գնում ՌԴ ԱԳՆ, պարոն Լավրովին առարկություններ ու պահանջներ չի ներկայացնում։ Ես անարդա՞ր եմ խոսում, ինչու՞ չեն անում»,-հարցադրում է անում գեներալ-լեյտենանտը՝ շեշտելով, որ հենց ինքը վարչապետը պետք է զանգի Ալիևին ու Պուտինին և ասի.«Մենք պայմանավորել ենք խուլիգանություններ չանել, ինչու՞ եք նման բան անում։ Ես ինձ բոլորից խելացի չեմ համարում, բայց կանոնները շատ լավ գիտեմ։ Ոչ մի բան չի արվում, իսկ Ադրբեջանն անընդհատ նման սանձարձակ գործողությունների է դիմում»։
Ըստ Տեր-Գրիգորյանցի՝ Ադրբեջանն անում է ամեն ինչ Ղարաբաղը հայաթափելու համար.«Բայց իրենք մոռացել են, որ Ղարաբաղի հայերը այն հայերը չեն, որ ապրում են Կիրովականում կամ Լեննականում, շատ ավելի խիստ, կանգուն ու հայրենասեր են։ Դա իրենց հողն է, որն իրենք ամեն ձև պաշտպանելու են։ Ես երեք տարի եղել եմ Աֆղանստանում, Աֆղանստանի ժողովուրդն էլ ճիշտ այդպիսին էր»,-եզրափակեց նա։
