ԱՄՆ պաշտպանության փոխնախարար Փոլ Ստոքթոնը հայտարարել է, որ ԱՄՆ-ին սպասում են տարերային աննախադեպ աղետներ: Ինչպես գրում է ամերիկյան The Daily Beast-ը, փոխնախարարը սպասվող արհավիրքները համեմատել է սեպտեմբերի 11-ի ահաբեկչության հետ: Նրա խոսքերով` «Կատրին» փոթորկից էլ ավելի հզոր արհավիրքների պատճառով ԱՄՆ-ի քաղաքացիների կյանքը կարող է կտրուկ փոխվել: «Լուրջ աղետները կունենան դոմինոյի հետևանք»,- ասել է Ստոքթոնը` նշելով, որ գլոբալ տաքացման հետևանքով կարող է բարձրանալ օվկիանոսի ջրի մակարդակը և մեծ վնաս հասցնել ԱՄՆ արևելյան ափի բնակչությանը:
Հրապարակված հոդվածում ԱՄՆ փոխնախարարն ասել է, որ 1811-1812 թվականներին Մեմֆիսում տեղի ունեցած մի շարք երկրաշարժների հետևանքով Միսիսիպի գետը փոխել էր իր հունը, ինչի արդյունքում նոր լճեր էին հայտնվել: Արհավիրքի հետևանքով մարդկային կորուստները քիչ էին, քանի որ աղետի գոտում բնակչություն գրեթե չկար:
Գիտնականների հաշվարկով, եթե այսօր նույն վայրում նույն ուժգնությամբ երկրաշարժ տեղի ունենա, ապա կզոհվի առնվազն 86 հազար մարդ, իսկ երկրի տնտեսությանը կհասցվի 300 միլիարդ դոլարի նյութական վնաս:
Ինչպես գրում է հոդվածի հեղինակը, ԱՄՆ պաշտպանության փոխնախարարը վստահ է, որ նման արհավիրքները կրկնվելու են, ինչն այսօրվա պայմաններում կարող է հանգեցնել աննախադեպ աղետի: Այս կապակցությամբ Ստոքթոնն ասել է, որ ԱՄՆ-ի համար ամենամեծ վտանգը ոչ թե ահաբեկիչներն են, այլ «Մայր Բնությունը»:
