Վաշինգտոնը մտադիր չէ ներողություն խնդրել ԱՄՆ-ի պետքարտուղար Էնթոնի Բլինքենի և ՌԴ ԱԳ նախարար Սերգեյ Լավրովի զրույցի համար, քանի որ խոսակցության ընթացքում նրանք քննարկել են ամերիկյան կողմին անհանգստացնող խնդիրներ: Այս մասին լրագրողների հետ ճեպազրույցի ժամանակ հայտնել Է ԱՄՆ պետքարտուղարության պաշտոնական ներկայացուցիչ Նեդ Փրայսը։
«Ես գիտեմ, որ մեր ռուս գործընկերները փորձում են դրանից աղմուկ բարձրացնել: Բայց մեր կողմից կարևոր է նշել, որ սա կարճատև շփում էր, այլ ոչ թե լիարժեք երկկողմ հանդիպում կամ երկարատև բանակցություններ: Բայց ավելի լայն իմաստով մենք ներողություն չենք խնդրի մեր շահերից դրդված գործողությունների համար», – հայտարարել է Փրայսը։
Այսպես Է նա պատասխանել այն հարցին, թե ով է նախաձեռնել արտաքին քաղաքական գերատեսչությունների ղեկավարների շփումը: Մինչ այդ Ռուսաստանի ԱԳՆ-ում ընդգծել Էին, որ Բլինքենն ինքն Է նախաձեռնել զրույցը։
Փրայսը նաև նշել է, որ զրույցի ընթացքում Բլինքենը Լավրովի հետ խոսել է Մոսկվայի կողմից Ռազմավարական հարձակողական զենքերի կրճատման մասին պայմանագրին մասնակցությունը դադարեցնելու մասին, արծարծել Է ամերիկացի Փոլ Ուիլանի հարցը, որը Ռուսաստանում դատապարտվել է լրտեսության համար:
Բլինքենը նաև անդրադարձել է Ուկրաինայոմ Ռուսաստանի ծավալած ռազմական գործողություններին՝ նշելով, որ Կիևը և Վաշինգտոնը ցանկանում են վերջ դնել հակամարտությանը:
Փրայսը նշել է, որ Մեծ 20-յակի երկրների գագաթնաժողովի ընթացքում բոլոր երկրները, բացի Ռուսաստանից և Չինաստանից, հայտնել են, որ ցանկանում են, որ պատերազմն ավարտվի ՄԱԿ-ի կանոնադրությանը համապատասխան: Իր հերթին Ռուսաստանի ԱԳ նախարարության պաշտոնական ներկայացուցիչ Մարիա Զախարովան հայտնել Է, որ Նյու Դելիում Լավրովի հետ կայացած զրույցի ժամանակ Բլինքենը չի բարձրացրել Ուիլանի փոխանակման թեման:
