Հայաստանի վարչապետ Նիկոլ Փաշինյանը երկօրյա աշխատանքային այց է կատարում Գերմանիա, որտեղ նա կհանդիպի այդ երկրի կանցլեր Օլաֆ Շոլցի, նաև նախագահ Շտայնմայերի հետ: Գերմանիայի հանգամանքին անդրադարձել եմ դեռևս շաբաթներ առաջ, երբ տեղեկություն եղավ, որ Հայաստանի նախագահ Վահագն Խաչատուրյանը հեռախոսազրույց է ունեցել այդ երկրի նախագահ Վալտեր Շտայնմայերի հետ: Այստեղ ուշադրության առարկան լոկ այն չէ, որ տեղի է ունեցել զրույց Հայաստանի և Գերմանիայի՝ Եվրամիության առաջատարներից մեկի նախագահի հետ:
Ուշադրության արժանի նրբերանգ է այն, որ Վալտեր Շտայնմայերը Գերմանիայի արտգործնախարար է եղել մի շրջափուլում՝ 2013-17 թվականներին, կանցլեր Մերկելի պաշտոնավարման ժամանակ, երբ առանցքային զարգացումներ էին տեղի ունենում Կովկասի շուրջ, իսկ Գերմանիան այդ առնչությամբ դրսևորում էր քաղաքական նկատելի աշխուժություն և դերակատարում: Այսօր սակայն, Բեռլինը թերևս ուկրաինական պատերազմի հետևանքով ամենից մեծ տնտեսա-քաղաքական հարված ստացած կենտրոններից մեկն է, եթե ոչ հենց ամենամեծ հարված ստացածը: Ուկրաինայի պատերազմը կտրել է Գերմանիա-Ռուսաստան էներգետիկ կապը, որը գերմանական տնտեսական շոշափելի զարգացման առանցքային սնուցող օղակներից մեկն էր:
Միևնույն ժամանակ, մեծ է քաղաքական ազդեցությունը, որ ուկրաինական պատերազմի «միջոցով» Եվրոպայի վրա հաստատել են Միացյալ Նահանգներն ու Մեծ Բրիտանիան, առաջացնելով «եվրոպական սուվերենության» այն խնդիրը, որի մասին ուկրաինական պատերազմից ի վեր բարձրաձայնում է Ֆրանսիայի նախագահ Մակրոնն ու փորձում այդ հարցում դիմադրություն ձևավորել Գերմանիայի օժանդակությամբ, եվրոպական անվտանգության այն ճարտարապետության շրջանակում, որտեղ Ֆրանսիան բաց տեքստով խոսում է նաև Ռուսաստանի դերը հաշվի առնելու անհրաժեշտության մասին: Այդ հանգամանքը իր ազդեցությունն ունի նաև մեր ռեգիոնի վրա, հաշվի առնելով մի շարք իրողություններ, այն տրամաբանության շրջանակում, որ Հայաստանի համար կարևորագույն խնդիր է Կովկասում դիմակայության սուր անկյունների նվազեցումն ու ռեգիոնը աշխարհաքաղաքական բախման պոլիգոնի չվերածելը:
Հայաստանի վարչապետի գերմանական այցը կարող է ունենալ այդ խնդիրներին առնչվող ուշագրավ երանգներ, հաշվի առնելով և այն, որ փետրվարի 23-ին Հայաստանի վարչապետը հեռախոսազրույց էր ունեցել ՌԴ նախագահ Պուտինի հետ, նրան իրազեկելով նաև իր մյունխենյան այցի ընթացքում ունեցած քննարկումների մասին: Ուշադրության է արժանի, որ դրանից հետո տեղի է ունենում Հայաստանի վարչապետի աշխատանքային այցը Գերմանիա, առավել ևս այն հայտարարության ֆոնին, որ օրերս արել էր Կրեմլի խոսնակ Պեսկովը, նշելով, որ Մոսկվան պատրաստ է հարաբերվել Ֆրանսիայի ու Գերմանիայի հետ, բայց նրանք հայտարարություններից բացի չեն դրսևորում կապի դուրս գալու նախաձեռնություն: