Կառավարությունն իր այսօրվա՝ փետրվարի 23-ի նիստում որոշում կայացրեց, որը միտված է առեւտրի դյուրինացմանը եւ մաքսազերծման ժամկետների կրճատմանը:
ՊԵԿ նախագահ Ռուստամ Բադասյանի խոսքով, այս նախագծով լուծում են սահմանահատման արագության հարցը. «Հիմա անցակետերում դեպի երկրի ներս տրանսպորտային միջոցները տեղափոխվում են տարանցման հայտարարագրերով, եւ ստացվում են իրավիճակներ, երբ մեկ բեռնատարի մեջ առկա են 10-15-20 ստացողի բեռ եւ դրանցից յուրաքանչյուրի համար պետք է լրացնել առանձին տարանցման հայտարարագիր, որը կարող է տեւել 5-15 րոպե: Այս փոփոխությամբ հնարավորություն է ստեղծվում լրացնել մեկ տարանցման հայտարարագիր: Եթե 10 հայտարարագրի դեպքում ժամկետը կարող է տեւել մինչեւ 2 ժամ, այս դեպքում կտեւի 20-25 րոպե»,-ասաց նա:
Բադասյանը նկատեց, որ ծանրաբեռնվածությունը անցակետերում մեծացել է. «2022 թվականին սպասարկել ենք 240 հազար հայտարարագիր՝ 2021-ի 158 հազարի փոխարեն»:
