Իսրայելական Izrus.co.il կայքի փոխանցմամբ՝ Հունաստանի և Իսրայելի պաշտպանության նախարարներ Պանոս Բեգիլիտիսը և Էհուդ Բարաքը կիրակի օրը Երուսաղեմում ստորագրել են երկու երկրների ռազմական համագործակցության մասին հուշագիր։ Այս մասին հայտարարել է Հունաստանի պաշտպանության նախարարությունը։
Հուշագրի բովանդակության մասին ոչինչ չի նշվում։ Հունաստանի պաշտպանության նախարարը վստահեցրել է, որ երկու երկրների կառավարությունները մտադիր են սերտորեն համագործակցել միմյանց հետ։ Նա նաև հավելել է, որ Հունաստանն Իսրայելի հետ կապերի սերտացումը չի դիտարկում որպես տարածաշրջանի այլ երկրների (Թուրքիայի) նկատմամբ հակակշիռ։
Հիշեցնենք, որ թուրք-իսրայելական ներկայիս հարաբերությունների կտրուկ վատթարացումից հետո Թուրքիայի վարչապետ Էրդողանը մտադիր է այցելել Եգիպտոս և տեղի զինվորական իշխանությունների հետ կնքել հակաիսրայելական դաշինք։
Ի դեպ, օգոստոսի 22-ին Պանոս Բեգիլիտիսը զգուշացրել էր Թուրքիային՝ կապված Արևելյան Միջերկրածովում Կիպրոսի նավթաորոնողական աշխատանքների հարցում վերջինիս որդեգրած դիրքորոշման հետ։ Բեգիլիտիսը հայտարարել էր, որ Անկարան տվյալ թեմայի շուրջ միակողմանի և միջազգային իրավունքին հակասող դիրքորոշում է որդեգրել՝ ընդգծելով, որ յուրաքանչյուրն իրավունք ունի այդ հարցում ընտրություն կատարելու։
