Օրերս Ուզբեկստանում կայացած միջազգային երաժշտական մրցույթին կրտսեր Ջիվան Գասպարյանը արժանացավ ՅՈւՆԵՍԿՕ-ի կողմից տրված հատուկ մրցանակին: Այս մասին այսօր լրագրողների հետ հանդիպմանը խոսեց մրցանակակիրը` ներկայացնելով փառատոնի կանոններն ու պայմանները:
Նշենք, որ ամեն տարի Ուզբեկստանի նախագահի կողմից կազմակերպվում է միջազգային երաժշտական մրցույթ-փառատոն: Սա 8-րդ մրցույթն էր, որին մասնակցելու են եկել երաժիշտներ շուրջ 52 երկրներից: Հայաստանն այս մրցույթում ներկայացրեց աշխարհահռչակ դուդուկահար Ջիվան Գասպարյանի թոռը` Ջիվան Գասպարյանը, ով մրցութային օրերին ներկայացրել է միայն հայկական ստեղծագործություններ:
«Կար իհարկե հնարավորություն ներկայացնելու տարբեր ժանրերի և երկրների երաժշտություն, բայց ես ավելի կարևորեցի հայկական երաժշտության ներկայացումը միջազգային փառատոնին»,- նշեց երաժիշտը:
Լրագրողի այն հարցին, թե ինչ նշանակություն ունեցավ մրցույթը երաժշտի համար, կրտսեր Ջիվանը պատասխանեց, որ այն շատ կարևոր էր, քանի որ նա առաջին անգամ ներկայացնում էր Հայաստանը այսպիսի մեծամասշտաբ մրցույթին: Անդրադառնալով իր հետագա գործունեությանը` երաժիշտը նշեց, որ ձայնագրում է սոլո ալբոմ և ունի շատ ծրագրեր, որոնք դեռևս նախագծման փուլում են:
