Նոր Զելանդիայի կառավարությունը միջազգային օգնություն է խնդրել «Գաբրիել» ցիկլոնի հետևանքների վերացման համար: Այդ մասին տեղեկանում Է ТАСС գործակալությունից:
Երկրի վարչապետ Քրիս Հիփքինսի խոսքով՝ «Նոր Զելանդիան ընդունում է միջազգային օգնության առաջարկները», քանի որ երկիրը կանգնած է «մեծ անորոշության և արտակարգ պայմանների առջև»:
«Ենթակառուցվածքի ծանրաբեռնվածությունը դեռ որոշ ժամանակ կպահպանվի, և ոչ մի կասկած չկա, որ մեր բնակչությունն այժմ լուրջ փորձություն է ապրում», – ասել Է վարչապետը։
Ավստրալիայի արտաքին գործերի նախարարությունում հաստատել են, որ օգնության խնդրանք են ստացել Նոր Զելանդիայի կառավարությունից, և արդեն ստեղծել են աշխատանքային խումբ, որն «առավելագույնս արագ կարձագանքի» հարևան պետության «բոլոր խնդրանքներին»:
«Մենք, անշուշտ, կօգնենք նրանց», – ասել է Ավստրալիայի ԱԳ նախարարության խոսնակ Էլիզաբեթ Փիքը։ Իրավիճակը Նոր Զելանդիայի Հյուսիսային կղզու կենտրոնական և հարավ-արևելյան տարածաշրջաններում շարունակում է մնալ բարդ: Հենց այդ հատվածներին է հասել փետրվարի 13-ին երկիրը պատուհասած ցիկլոնի հիմնական հարվածը:
Ոչ մեծ բնակավայրերի մի մասը հեղեղված Է, և դրանց ավելի քան 9 հազար բնակիչներ գտնվում են տարհանման կենտրոններում։ Էլեկտրահաղորդման գծերի վնասման պատճառով առնվազն 250 հազար մարդ մնացել է առանց էլեկտրականության և կապի, որոշ ճանապարհներ և կամուրջներ ավերվել են սողանքների և հեղեղումների հետևանքով։ Հյուսիսային կղզում խանութների մեծ մասը փակ է, իսկ ջրհեղեղից տուժած բնակավայրերում խմելու ջրի ու սննդի մատակարարումն իրականացվում է ուղղաթիռներով։
Նոր Զելանդիայի ոստիկանությունը հայտնել է, որ ցիկլոնի առաջացրած փոթորիկների և ջրհեղեղների հետևանքով զոհվածների թիվը հասել է 5-ի, ևս մի քանի մարդ համարվում Է անհետ կորած, իսկ 105 քաղաքացիներ փետրվարի 13-ից կապի դուրս չեն եկել հարազատների և մերձավորների հետ։
Գերատեսչությունից հայտնել են նաև, որ անցած գիշեր ոստիկանության աշխատակիցները ձերբակալել են հինգ հոգու կողոպուտի համար։ Ակնկալվում է, որ սննդամթերքի մատակարարումները կկարգավորվեն ուրբաթ օրը՝ փետրվարի 17-ին, երբ կսկսեն գործել Հյուսիսային կղզու հյուսիսարևելյան ափին գտնվող նավահանգիստները: Հինգշաբթի օրվա վերջին իշխանությունները նաև նախատեսում են բացել մայրուղիների մի մասը՝ առաջին անհրաժեշտության ապրանքները ցիկլոնից տուժած քաղաքներ հասցնելու համար։
