Վերջին երկու տարում Հայաստանը Իրանի հետ առևտրային հարաբերություններում մեծ առաջընթաց է գրանցել։ Էկոնոմիկայի նախարար Վահան Քերոբյանը նշել է, որ 2020 թվականին մեր առևտրաշրջանառությունը կազմել է մոտ 400 միլիոն դոլար, 2021 թվականին՝ 500 միլիոն դոլար, իսկ 2022 թվականին՝ 700 միլիոն դոլարից ավել։ Նախարարի կարծիքով՝ մոտ ապագայում Իրանի հետ փոխադարձ առևտրում կհատենք 1 միլիարդի սահմանը։
Այ առնչությամբ՝ tvyal.com կազմակերպության ղեկավար, ՀՊՏՀ դոցենտ տնտեսագետ Աղասի Թավադյանն «Առաջին լրատվկան»-ի հետ զրույցում նշեց, որ Իրանն այն երկրներից է, որի հետ ապրանքաշրջանառության մեծացումը շատ կարևոր նշանակություն ունի Հայաստանի համար:
«Եթե թվերը նայենք, կտեսնենք, որ դեպի Իրան արտահանումը 2022-ին մեծացել է 70 տոկոսով, աճելով 65 մլն-ից մինչև 111 մլն դոլարի: Մենք Իրան հիմնականում արտահանում ենք էլեկտրաէներգիա՝ գազի դիմաց: Այսինքն գազը ներկրում ենք էելեկտրաէներգիա արտահանում ենք: 2021-ին էլեկտրաէներգիան կազմել է ընդհանուր դեպի Իրան արտահանման 71 տոկոսը: Ու թեև 2022-ին էլեկտրաէներգիայի արտահանման ոլորտում աճ ենք ունեցել 42,4 տոկոսով, բայց ընդհանուր արտահանման մեջ էլէներգիան կազմել է մոտ 60 տոկոս: Սա նշանակում է, որ այլ ապրանքների արտահանումը, որոնք մինչ այդ չէինք արտահանում, 2022-ին աճել են: Մինչև 2022 թվականը օրինակ, մենք ծխախոտ չենք արտահանել, այս տարի ունենք զգալի աճ: Մոտավորապես 21 մլն դոլարի ծխախոտ ենք արտահանել: Նույնը վերաբերում է հանքաքարին, այս տարի մոտ 30 մլն դոլարի հանքաքար ենք արտահանել, մինչդեռ մինչ այդ չէինք արտահանում: Նաև արտահանել ենք ապակի, փայտ, ալյումին, որոնց ուղղությամբ ևս մեծ աճ ունենք: Այսինքն դեպի Իրան արտահանումը ոչ միայն աճել է, այլև որոշակիորեն դիվերսիֆիկացվել է»,-ասաց տնտեսագետը:
Ինչ վերաբերում է Իրանից Հայաստան ներմուծմանը, ապա այստեղ ևս, ըստ Թավադյանի, աճ է գրանցվել. «2022-ին Իրանից ներմուծումն աճել է 37 տոկոսով: 2022-ի ամռանը պայմանավորվածություն ձեռք բերվեց կառուցել հայ-իրանական ապրանքների տաղավար, ընդհանուր առմամբ սա կարևոր ուղղություն է զարգացման: Առևտրաշրջանառության տվյալները ցույց են տալիս մեծ աճ, և հնարավոր է, որ Իրանի հետ ապրանքշրջանառությունը մեծանա»,-ասաց նա:
