Արաբական երկրների լիգա կազմակերպությունում Լիբիայի ազգային անցումային խորհրդի ներկայացուցիչ Աբդ Ալ-Մունիմ Ալ-Խունին տեղեկացրել է Լոնդոնում լույս տեսնող Asharq Al-Awsat թերթին, որ գնդապետ Քադաֆին պատրաստվում է Լիբիայի հարավային հարևան Մալիի տարածքով տեղփոխվել Հարավաֆրիկյան Հանրապետություն: Նրա տեղեկություններով` Քադաֆին վերջին շրջանում բանակցություններ է վարել ՀԱՀ-ի ղեկավարության հետ և զգալի գումարներ է տեղափոխել այնտեղ:
Նշվում է, որ Քադաֆին մշտական կապի մեջ է ՀԱՀ ղեկավարության հետ, որի նախագահ Յակոբ Զուման համարվում է գնդապետի ընկերներից մեկը: Ալ-Խունին համոզմունք է հայտնել, որ մյուս երեք հարևանները` Եգիպտոսը, Թունիսն ու Ալժիրը, թույլ չեն տա Մուամար Քադաֆիին նրանց տարածքով լքել Լիբիան: Ալ-Խունին ասել է, թե քանի որ վերջերս Սուդանն ու Չադը ճանաչել են Ազգային անցումային խորհուրդը, ապա այս պահին Քադաֆին երկիրը կարող է լքել միայն Մալիի տարածքով, որովհետև Նիգերի նախագահ Մահամադու Իսուֆուն միշտ էլ սառը հարաբերություններ է ունեցել Քադաֆիի հետ:
