2022 թվականին կաթնամթերքի շուկայում լուրջ կրճատումներ են եղել։ Կաթի սակավություն ու թանկացում, գազի ու էլեկտրաէներգիայի գների բարձացում, լոգիստիկ ու բազմաթիվ այլ խնդիրներ կան այսօր կաթնամթերքի շուկայում։
Վիճակագրական կոմիտեի տվյալներով` 2022 թվականի առաջին 11 ամիսներին Հայաստանում արտադրվել է շուրջ 5 հազար տոննա թթվասեր, որը նախորդ տարվա նույն ժամանակահատվածի համեմատ կրճատվել է 17%-ով: Կրճատվել են նաև մածունի, պաղպաղակի արտադրությունները:
«Ագրագյուղացիական միավորում» ՀԿ նախագահ Հրաչ Բերբերյանը «Առաջին լրատվական»-ի հետ զրույցում նշեց, որ արդեն երրորդ տարին է, որ ինքն ահազանգում է որ ունենք գլխաքանակի անկում. «Բնականաբար, բիզնեսի արժեքը բարձրացել է: Շուկան չճանաչելով՝ նախարարարները հայտարարություններ են անում, հիմնական դրդապատճառը եղել է երկու տարի առաջվա երաշտը, անասնակեր չկարողացանք ապահովել, և երեք տարի է կառավարությանը զգուշացնում ենք, սակայն որևէ միջոցառում կառավարությունն այդ ուղղությամբ չիրականացրեց։
Հիմա կայունացել է վիճակը, բայց սա արդյունք է երկու-երեք տարի սխալ քաղաքականության, սա ազդել է նաև գնի աճի վրա և կաթով արտադրանքի վրա։ Կաթի արտադրությունը լավ վերահսկողության տակ պետք է վերցնել, շատ հաճախ կաթի փոշի է խառնվում, նաև թխվածքների մեջ են կաթնախառնուրդ ավելացնում։ Բնագավառը պետք է տանել բարեփոխումների: Մենք տեսանք՝ խաղողի մթերման հետ կապված ինչ վիճակ էր, հիմա էլ այգիններն են քանդում»,-հայտարարեց Բերբերյանը:
Նա նկատեց, որ իրավիճակը չեն բարեփոխում, հույսը մի քանի գործարանի վրա են դնում, ֆինանսավորում են. «Այս տարի խաղողի ինքնարժեքը 120 դրամ է եղել, բայց ստիպել են գյուղացուն 100 դրամով հանձնել, նույնը կաթի արտադրության մեջ է:
Վիճակագրկան կոմիտեի վերջին տվյալներով՝ 2022 թվականի դեկտեմբերին, 2021 թվականի նույն ամսվա համեմատ, կաթնամթերքը Հայաստանում միջինը 11.4%-ով թանկացել է։ Գործարաններ կան փակված»:
Հարցին, թե ինչո՞ւ է միսն այսքան թանկացել շուկայում, Բերբերյանը պատասխանեց. «Որովհետև մսի քանակ չկա, վերջին երեք տարիներին 100 000 կթու կովի պակաս ունենք: Դրա հետևանքով էլ մսամթերքը և կաթնամթերքը թանկանում են։
Փոխանակ գլխաքանակ ավելացնեն, ականջակալներ են ավելացնում կովերի ականջներին: Իհարկե, համարակալումը կարևոր է, բայց այդ ո՞ր գյուղացին է գնալու ասի՝ գիտեք ինչ կա, ես իմ կովին մորթել եմ»:
Հրաչ Բերբերյանը նաև նկատեց, որ կովերի գլխաքանակը շատ դանդաղ է վերականգնվելու, նվազագույնը 5 տարի կպահանջվի, իսկ, օրինակ, ոչխարը երեք տարում կվերականգնվի: