2018 թվականից մինչև հիմա 40 տոկոսից ավելի ավելացել է պետական պարտքը: Քիչ երկրներ կգտնեք, որ տարեկան 10 տոկոսով պետական պարտք է ավելանում: 2022 թվականին Հայաստանի պետական պարտքն ավելացել է ավելի քան 1 մլրդ 400 մլն դոլարով և հատել 10 մլրդ դոլարի սահմանը։
Տնտեսագետ Հրանտ Միքայելյանը «Առաջին լրատվական»-ի հետ զրույցում, անդրադառնալով պետական պարտքի ավելացմանը, նշեց, որ ցանկացած պարագայում պարտքի ավելացումը խնդրահարույց է, քանի որ ստեղծում է ապագայի համար կարիք, որ ապագայում տոկոսները մարվեն և հետո այդ պարտքը ապագա սերունդների խնդիրն է դառնում. «2022-ին աճած պարտքը հիմնականում պայմանավորված է դրամի փոխարժեքի փոփոխությամբ, որովհետև ներքին պարտքը, որն ավելացել է, նոմինացված է դրամով, ինչը նշանակում է, որ դոլարով կարող է շատ ավելանա: Բայց 2022-ին արտաքին պարտքը դրամով նվազել է՝ փոխարժեքով պայմանավորված»,-ասաց նա:
Տնտեսագետը նկատեց, որ պետական պարտքի չափը բավականին մեծ է. «Ամեն դեպքում նման տարիներին, երբ ունենք մեծ տնտեսական աճ, պետք է այնպես անել, որ պարտքը չաճի: Մենք այս տարի երկնիշ տնտեսական աճ ենք գրանցել, դեռ չունենք վերջնական թվերը, բայց այս պահի դրությամբ կարելի է ենթադրել 14 տոկոսի չափով կլինի տնտեսական աճը, ինչը հուշում է, որ բարձր ցուցանիշներ են արձանագրվել։ Հետևաբար, պետք է սկսել բյուջեի պակասորդը նվազեցնել։ Մյուս կողմից մենք ներքին պարտքի ավելացում ունեցանք։
Այնպես որ պետական պարտքը աճել է, բայց սա չի նշանակում, թե առհասարակ նոր ինտենսիվ պարտքեր են ավելացել 2022-ին: Ավելի ճշգրիտ քաղաքականություն կարելի էր վարել, որ բալանսավորվեր իրավիճակը»,-ընդգծեց նա:
Հրանտ Միքայելյանի խոսքով, բյուջետավորման գործընթացը բավականին նրբություններ է իր մեջ պարունակում և կարող են լինել կարիքներ, որոնց բավարարելու համար պետք է պետական ծախսերն ավելացնել. «Մենք շատ հաճախ տեսնում ենք որոշակի քայլեր, օրինակ, թոշակների, աշխատավարձերի բարձրացում, ինչն իհարկե, լավ է, բայց միաժամանակ պետք է գիտակցել, որ այդ փոփոխությունները պետք է կատարել այն չափով, որ չափով թույլ են տալիս այս պահի դրությամբ երկրի տնտեսական հնարավորությունները, իսկ մենք դա փորձում ենք միշտ գերազանցել ինչն էլ ստեղծում է ռիսկեր»,-ընդգծեց տնտեսագետը:
Ռիսկերը, ըստ նրա, ֆինանսական կայունության տեսանկյունից են ստեղծվում. «Օրինակ, եթե պետությունն իր վրա վերցրել է աշխատավարձերի բարձրացման պարտավորություն և այդ տարի ունենանք տնտեսական ճգնաժամ, ո՞նց ենք անելու: Պետական պարտք պետք է վերցնենք և տանք, ինչը նորից խնդիր է ստեղծում, քանի որ մենք 400 միլիոն տալիս ենք ամեն տարի նախորդ տարիների պարտքերի դիմաց։ Աշխատավարձերի աճը, խոշոր հաշվով, պոպուլիստական նպատակներով են արել, թեև ռիսկը ոչ միշտ է բարձր եղել: Ես չեմ հիշում, որ մասնագետների հետ լուրջ խորհրդակցություն եղած լինի»,-ընդգծեց Միքայելյանը՝ հավելելով, որ 2022-ին մեծ պարտքի աճ չի եղել։