Ալեքսանդր Սպենդիարյանի անվան օպերայի և բալետի ազգային-ակադեմիական թատրոնն իր նոր թատերաշրջանը կնվիրի Հայաստանի անկախության 20-ամյա տարեդարձին: Նոր թատերաշրջանը կբացվի սեպտեմբերի 15-ին՝ Արմեն Տիգրանյանի «Անուշ» օպերայով: Ամսի 17-ին կներկայացվեն «Սպարտակ», իսկ հոկտեմբերի 2-ին՝ «Ռոմեո և Ջուլիետ» բալետները: Այս մասին «Առաջին լրատվականի» հետ զրույցում տեղեկացրեց Օպերայի գլխավոր բալետմայստեր, ՀՀ վաստակավոր արտիստ Ռուդոլֆ Խառատյանը:
Նա հայտնեց նաև, որ այս տարի կիրակի օրերին Ալ.Սպենդիարյանի անվան օպերայի և բալետի ազգային ակադեմիական թատրոնը ցերեկային ներկայացումներ կբեմադրի պատանիների համար: «Մատաղ սերնդին պետք է բերենք թատրոն, որ վաղն արտադրենք ոչ թե սերիալներ նայողներ, այլ բալետ ու օպերա գնահատողներ»,- նշեց Ռ.Խառատյանը՝ տեղեկացնելով, որ ցերեկային ներկայացումների համար կբեմադրվի նոր «Ժիզել», «Ռոմեո և Ջուլիետ», կցուցադրվի «Դոն Կիխոտ»-ը:
«Շատ խիտ գրաֆիկ ունենք, դեռ շատ բան ունենք անելու»,- ասաց օպերայի գլխավոր բալետմայստերը:
