Այսօր Շիրակի մարզի տարեվերջյան խորհրդի նիստն անցկացվել է ընդարձակ կազմով՝ մասնակցությամբ մարզային իշխանության, համայնքների, ուժային կառույցների, մարզպետարանի ենթակայության հաստատությունների ղեկավարների, աշխատակիցների, ԶԼՄ ներկայացուցիչների։ Մինչ օրակարգային հարցերի քննարկումը, Շիրակի մարզպետ Նազելի Բաղդասարյանը պարզաբանել է՝ ինչու են մեծաթիվ պաշտոնյաներ և իրենց ոլորտներում տարբեր պատասխանատուներ հրավիրված։
«Տարեվերջյան նիստն ընդարձակ կազմով ենք անցկացնում, որովհետև մարզում առկա խնդիրների մասին պետք է խոսել բաց, առավել ևս՝ լրատվամիջոցների ներկայացուցիչների և հանրության առաջ։ Ես կարծում եմ, որ պետական և հանրային ցանկացած գործիչ իր գործելակերպում պետք է լինի թափանցիկ, հաշվետու, և նրա գործունեությունը բացառապես պետք է հիմնված լինի օրինականության վրա։ Մոտեցումներում խստությունն ինքնանպատակ չէ, պարզապես պետք է արձանագրվի, որ օրինականությունն առավել է ամեն ինչից։ Ցավոք, հաճախ կան դեպքեր, երբ պաշտոնյաներն ունենում են կաշկանդվածություն՝ գործելակերպի կամ մոտեցումների։ Երբ չգիտեք՝ ինչպես վարվեք, առաջարկում եմ օրենքով շարժվել։
Մենք շարունակելու ենք պահել մեր որդեգրած քաղաքականությունը՝ զրո հանդուրժողականություն կոռուպցիայի նկատմամբ։ Թեև մեզանից շատերը կարծում են, որ կոռուպցիան կաշառք տալ կամ ստանալն է, բայց շահերի բախումը, պաշտոնեական դիրքի չարաշահումը, հովանավորչությունը և այլ արատավոր երևույթները նույնպես կոռուպցիայի դրսևորումներ են: Ցանկացած դեպքում, երբ որ դա կնկատվի, կլինեն հստակ քրեաիրավական հետևանքներ»,- մանրամասնել է մարզպետը։
Փաստվել է, որ մարզպետարանը հրապարակային է եղել մարզպետի բոլոր որոշումների հրապարակման առումով։ Տարեսկզբից մինչ օրս Շիրակի մարզպետն ընդունել է 675 որոշում, նախորդ տարի դրանց թիվը 451 է եղել։ Մարզպետի համապատասխան որոշումներով ֆինանսական օգնություն է տրամադրվել 998 քաղաքացու, մինչև տարեվերջ նրանց թիվն ավելանալու է։ Մարզպետն ասաց՝ այս հարցում ևս մոտեցում է փոխվել։
«Մինչ իմ մարզպետ նշանակվելը դրամական աջակցություններն ու ֆինանսական հատկացումները որևէ կերպ չեն կանոնակարգվել։ Այժմ հստակեցված են չափորոշիչները, թե ում որքան, ինչպես և ինչու է տրամադրվում գումարը։ Նաև հստակեցվել են դիմելու ժամկետները։ 6 մասից շուտ այլևս դիմել չեն կարող, ինչը բերել է դիմումների նվազման։ Ես միշտ նշել եմ՝ ՀՀ քաղաքացուց անքակտելի է նրա արժանապատվությունը։ Կներեք, բայց քաղաքացուն 10 հազար դրամ տալը նվաստացուցիչ է։ Մենք ունենք սահմանված սանդղակներ ու չափորոշիչներ»,- ասել է Բաղդասարյանը։
Մարզպետը նաև կարևոր մեկ հանգամանք է ընդգծել. յուրաքանչյուր նիստից 1-2 օր առաջ մարզպետի որոշմամբ նոր հանձնաժողով է ձևավորվում։ Արդյունքում՝ սուբյեկտիվ մոտեցումները այս հարցում բացառվում են։
«Հետևողական և աչալուրջ աշխատանքը մեր յուրաքանչյուրի պարտականությունն է՝ անկախ նրանից՝ պետական, հանրային ինչ պաշտոն եք զբաղեցնում, և դրա կարևոր ցուցիչը քաղաքացու գոհունակությունն է։ Եթե մեր երկրի քաղաքացին գոհ է մեզանից, ուրեմն մենք լավ ենք աշխատում, հակառակը չի կարող լինել։ Մոտեցումներն ու ձեռագիրը շարունակում է մնալ նույնը»,- ընդգծել է նա:
Կրթական ու առողջապահական հաստատությունների տնօրեններին Բաղդասարյանը հորդորել է լինել զգոն, աշխատանքում՝ առավել պարտաճանաչ։
«Քաղաքացիների հետ շփման ընթացքում բազմաթիվ ահազանգեր ենք ստանում առավելապես բուժհաստատություններում սպասարկման որակի վերաբերյալ, դժգոհություններ կան նաև ուռճացված հաստիքացուցակների հետ կապված։ Ես խնդրում եմ, որ դուք առավել ուշադիր լինեք սպասարկման որակի պատշաճ կազմակերպման վրա։ Նշեմ, որ դպրոցներում նույնպես ունենք բազմաթիվ խնդիրներ, հաստիքացուցակներում առկա են անհասկանալի հաստիքներ, և լիահույս եմ, որ 2023 թվականին, իմ մոտեցումներին համապատասխան, հաստիքացուցակները կվերանայվեն»,- ասել է Բաղդասարյանը։
Մարզպետը նաև հայտարարել է, որ հավելավճարներն ու պարգևավճարները ինքնանպատակ չեն, և դրանք տրվում են, երբ իրականացվում է պատշաճ աշխատանք՝ որպես խրախուսանք։ Մինչ տարեվերջ այս հարցում փոփոխություններ չեն լինի։
