Պերուում հակակառավարական ցույցերի ընթացքում զոհերի թիվը հասել է 7-ի: Երկրի նոր նախագահ Դինա Բոլուարտեն օրենսդիրներին առաջարկել է ընտրությունները նախատեսված ժամկետից 2 տարի շուտ անցկացնել: Այս մասին հաղորդում է Retuers գործակալությանը:
Պերուի նախկին փոխնախագահ Դինա Բոլուարտեն նախագահի պաշտոնը ստանձնել է անցյալ շաբաթ, այն բանից հետո, երբ խորհրդարանը իմփիչմենթ հայտարարեց երկրի նախագահ Պեդրո Կաստիլիոյին, որն այնուհետև ձերբակալվեց:
Կաստիլիոյի աջակիցները պնդում են, որ Բոլուարտեն չի ընտրվել ժողովրդի կողմից: Ցուցարարները դուրս են եկել փողոց՝ պահանջելով նոր ընտրություններ անցկացնել, ցրել խորհրդարանը և ազատ արձակել Կաստիլիոյին:
Պերուի Մարդու իրավունքների պաշտպանի գրասենյակը հայտնել է, որ ցույցերի երկու օրերի ընթացքում 7 մարդ է մահացել՝ բոլորը հրազենային վնասվածքներից: Զոհերի մեծ մասը պատանիներ են: Վիրավորվել է 32 քաղաքացիական անձ և 24 իրավապահ:
Բոլուարտեն, ով վերջին 5 տարիների ընթացքում Պերուի արդեն 6-րդ նախագահն է, հայտարարել է, որ առաջարկում է 2026 թ.-ի փոխարեն ընտրություններն անցկացնել 2024 թ.-ի ապրիլին՝ հաշվի առնելով «դժվար ժամանակները»:
Իսկ Կաստիլիոն իր Twitter-ի էջում նամակ է հրապարակել՝ Բոլուարտեի կողմից վաղաժամ ընտրություններ անցկացնելու նախաձեռնությունն անվանելով «կեղտոտ խաղ» և նրան անվանելով «ուզուրպատոր»: Կաստիլիոն հայտնել է, որ չի հրաժարվում նախագահությունից: Կաստիլիոն այժմ գտնվում է Լիմայի քրեակատարողական կենտրոններից մեկում: Նա մեղադրվում է կոռուպցիայի մեջ: