Բելառուսի նախագահ Ալեքսանդր Լուկաշենկոն խոստացել է մինչև 2011 թ. հոկտեմբերի կեսերը ազատ արձակել երկրի բոլոր քաղբանտարկյալներին: Այս մասին հաղորդում է Reuters գործակալությունը:
Գործակալության տրամադրության տակ է հայտնվել Բուլղարիայի արտաքին գործերի նախարար Նիկոլայ Մլադենովի նամակը՝ ուղղված Եվրամիության արտաքին գերատեսչության ղեկավար Քեթրին Էշթոնին և ԵՄ արտգործնախարարներին, որում նա պատմում է, թե Լուկաշենկոյի հետ օգոստոսի վերջին կայացած հանդիպման ժամանակ Բելառուսի նախագահը խոստացել է, որ մեկուկես ամսվա ընթացքում ազատ կարձակի բոլոր քաղբանտարկյալներին: Բացի այդ, Լուկաշենկոն ասել է, որ նախատեսում է ընդդիմության հետ կլոր սեղաններ կազմակերպել առկա խնդիրները քննարկելու համար:
Գործակալությունը նաև հաղորդում է, որ Բուլղարիան ստանձնել է միջնորդական առաքելություն Բելառուսի և ԵՄ միջև հարաբերություններում, ինչը հրաժարվել էին անել Իտալիան և Լիտվան: Հիշեցնենք նաև, որ 2010 թ. դեկտեմբերին Բելառուսում կայացած ընտրություններից հետո ցույցերի ժամանակ ձերբակալվել էին նախագահի գրեթե բոլոր թեկնածուները, նրանց մի մասը շարունակում է բանտերում մնալ:
