Թուրքական Haber Türk թերթի փոխանցմամբ՝ Թուրքիայում մեկնարկել են թուրքերեն լեզվի կանոններին համապատասխան Սահմանադրության տեքստի վրա աշխատանքները։ Դա նախաձեռնել է իշխող «Արդարություն և զարգացում» կուսակցությունը (ԱԶԿ)։ Այդ նպատակով ստեղծվել է հատուկ հանձնաժողով, որը գլխավորելու է Թուրքերեն լեզվի ու գրականության ասոցիացիայի ղեկավար և ԱԶԿ փոխնախագահ Էքրեմ Էրդեմը։
Վերջինս նշել է. «Դժբախտաբար մեր Սահմանադրությունը չի գրվել մաքուր թուրքերեն լեզվով։ Լեզվական կանոնների տեսանկյունից այն գտնվում է շատ վատ վիճակում, դրանում առկա են 1877 թվականի հնաբանություններ։ Մենք ցանկանում ենք, որ յուրաքանչյուր ոք կարողանա հիշել նոր Սահմանադրությունը։ Ցանկանում ենք դրանք նմանեցնել պատգամավորի երդմանն առնչվող կետային նախադասություններին»։
Նշվում է, որ տոներից հետո այս գործընթացը նոր տեմպ է հավաքելու։ Ակնկալվում է, որ հոկտեմբերին Թուրքիայի վարչապետ Էրդողանը հանդիպումներ է ունենալու թուրքական ընդդիմության առաջնորդներ «Ժողովրդա-հանրապետական» կուսակցության (ԺՀԿ) ու «Ազգայնական շարժում» կուսակցության (ԱՇԿ) նախագահներ Քեմալ Քըլըչդարօղլուի ու Դևլեթ Բահչելիի հետ և քննարկելու է նոր Սահմանադրության հարցը։
Սակայն քրդական «Խաղաղություն ու ժողովրդավարություն» կուսակցությունը (ԽԺԿ) դրան մասնակցելու հրավեր չի ստացել, քանի որ իշխող կուսակցության կարծիքով՝ ԽԺԿ-ն բացասական դիրքորոշում է որդեգրել սահմանադրական բարեփոխումների նկատմամբ։
Հիշեցնենք, որ 1980 թվականի սեպտեմբերի 12-ին Թուրքիայի Հանրապետության պատմության ընթացքում տեղի ունեցած ամենաարյունալի ռազմական հեղաշրջումից հետո՝ 1981 թվականի հունիսի 29-ին, թուրքական ռազմական խունտան ընտրեց 160 խորհրդատուի, որոնց հանձնարարեց զբաղվել նոր Սահմանադրության մշակմամբ:
Վերջիններս առաջ քաշեցին 800 նոր օրենքներ: 1982 թվականի նոյեմբերի 7-ին նոր Սահմանադրությունը դրվեց հանրաքվեի ու ստացավ մասնակիցների 92 տոկոսի աջակցությունը: Դրանով մեծ լիազորություններ շնորհվեցին ուժային ու դատական կառույցներին, որոնց իրավունքների սահմանափակման ուղղությամբ տարիներ շարունակ պայքարում է Էրդողանը, և առաջիկա նոր Սահմանադրությունը գործուն քայլ կհանդիսանա տվյալ ուղղությամբ։
