Հանրային ծառայությունները կարգավորող հանձնաժողովի նախագահ Գարեգին Բաղրամյանը չի բացառել, որ դոլարի փոխարժեքի նվազումն իր ազդեցությունը կարող է ունենալ քաղաքացիների համար սահմանված էլեկտրաէներգիայի սակագնի վրա: Բաղրամյանն ասել է. «Էներգետիկայի ոլորտում հանձնաժողովն ինքն է իր նախաձեռնությամբ է սկսում սակագների վերանայում: Եվ յուրաքանչյուր տարի՝ անկախ նրանից, թե վերջնական սպառողի համար գնի փոփոխություն լինելու է, թե ոչ, մենք բոլոր արտադրողների և ՀԷՑ-ին վաճառվող գնի փոփոխություն ենք անում, քանի որ առնվազն կառուցվածքի փոփոխություն է տեղի ունենում: Միանշանակ փոխարժեքի նվազումն ունենալու է իր դրական ազդեցությունը»:
Տնտեսագետ Հրանտ Միքայելյանը «Առաջին լրատվական»-ի հետ զրույցում, անդրադառնալով էլեկտրաէներգիայի հնարավոր նվազմանը, նշեց. «Մենք ներմուծում ենք գազը, որի գինն անփոփոխ է, ներմուծում ենք նախապրոդուկտները, որոնք թանկացել են, մենք ներկրում ենք ուրան, որը ենթադրում ենք դրամի փոխարժեքի աճի տեսանկյունից նվազել է, և տեղական ցանցի արտադրանքի վրա ծախս, որոնք աճել են մոտավորապես տասը տոկոս, այսինքն՝ տեսականորեն մինչև տասը տոկոս էլեկտրաէներգիայի գնի իջեցում կարող է տեղի ունենալ»:
Անդրադառնալով ոլրտում առկա խնդիրներին, տնտեսագետն ասաց. «Դրամի արժևորում անկայուն միտում է, ամեն ամիս 200 միլիոն դոլարի մաքուր ներհոսք ունենք: ՌԴ-ից ներհոսքը լրացուցիչ 340 դոլար է, իսկ դեպի արևմուտք արտահոսքը մոտավորապես 140 միլիոն դոլար, մոտավորապես 200 միլիոն դոլար մնում է Հայաստանում, և սա պայմանավորում է դրամի բարձր փոխարժեքը: Եթե այս միտումը դադարի, նորից ստիպված ենք լինելու գները բարձրացնել, ինչը ծանր կլինի բնակչության համար, կարող են նորից պարտքեր գոյանալ։ Այս պարագայում ես խորհուրդ կտայի ոչ թե սակագները իջեցնել, այլ պարտադրել արտադրողներին ստեղծելու ֆինանսական պաշար, որն, ըստ անհրաժեշտության, կկարողանան ծախսել: Այսպիսով Հայաստանը երաշխավորված կլինի ճգնաժամերից։ Հիմա կոնսենսուս կա, որ 2023-ին համաշխարհային ճգնաժամ կարող է սկսվել։ Այսպիսով, մենք պետք է գիտակցենք, որ այս տարի ունենք դրական կոնյուկտուրա, բարձր աճի տեմպեր, բայց մենք երաշխավորված չենք, որ սա կշարունակվի երկու տարվա կտրվածքով»:
Հրանտ Միքայելյանի կարծիքով, ավելի երկարաժամկետ պետք է մտածել, ցանկացած որոշում հանրային ծառայությունների ոլորտում գոնե 3-5 տարվա կտրվածքով պետք է լինի. «Ճգնաժամի ժամանակ շատ ճկունություն է հարկավոր։ Պատկերացնենք, որ ճգնաժամ է սկսվում, բնակչության մաքուր եկամուտները նվազում են, և այս պարագայում բարձրանում է գազի գինը։ Ասում են դրամը թանկացել է և դրանից ելնելով գնաճը զսպվում է, բայց մենք տեսնում ենք, որ զգալի ազդեցություն գնաճի վրա չի ունեցել»,-ասաց նա: