«Ապագա Հայկական»-ի համաժողովին ընդառաջ նոյեմբերի 5-ին կայացավ «Պատմական պատասխանատվություն» փորձագիտական հանձնախմբի առաջին առկա հանդիպումը՝ Արևմտյան Եվրոպայի Հայրապետական պատվիրակ և Սուրբ Աթոռում Հայ Առաքելական Սուրբ Եկեղեցու ներկայացուցիչ Գերաշնորհ Տեր Խաժակ Արքեպիսկոպոս Պարսամյանի գլխավորությամբԼ։ «Ապագա հայկականը» զարգացման հիմնադրամի գործադիր տնօրեն Արտակ Ապիտոնյանն ասաց, որ մինչ այս հանձնախմբի բոլոր հանդիպումները եղել են առցանց ձևաչափով:
«Հանրային քննարկմանը պատշաճ նախապատրաստվելու, սցենարները մշակելու համար մենք ստեղծել ենք այս փորձագիտական հանձնախմբերը: Մեր նախորդ հանդիպումը նվիրված էր ցեղասպանության խնդրի ճանաչմանը: Մեր քննարկման հիմնական թեման է լինելու հայապահպանության խնդիրը որպես պատմական պատասխանատվություն»,-ասաց նա:
Գերաշնորհ Տեր Խաժակ Արքեպիսկոպոս Պարսամյանն էլ հավելեց, որ պատմական պատասխանատվության մասին տարբեր գաղափարներ առցանց քննարկումների արդյունքում արդեն արձանագրվել են:
«Մենք հարուստ ժառանգություն ունենք թե՛ հոգևոր, թե՛ մշակութային իմաստով, և այդ ժառանգությանը շատերը ծանոթ չեն, և հետևաբար, իբրև պատմական պատասխանատվություն, պետք է այդ ժառանգությունը հստակեցնենք և կարողանանք երիտասարդ սերնդին փոխանցել վաղվա նպատակի համար»,-ասաց նա:
«Ապագա հայկական»-ի համաժողովը տեղի կունենա 2023թ.-ի մարտի 10-12-ը:
«Ապագա հայկական»-ի առաջին համաժողովին ընդառաջ ստեղծվել են երեք հանձնախմբեր՝ «Հայաստան-Սփյուռք միասնականություն», «Պատմական պատասխանատվություն», «Բնակչության աճ»՝ իրենց շուրջը համախմբելով Հայրենիքի և Սփյուռքի ոլորտային հանրաճանաչ ու առաջատար մասնագետներին։