Ճապոնական Sony, Toshiba և Hitachi ընկերությունները համախմբում են դիսփլեյներ արտադրելու իրենց կարողությունները, որպեսզի հիմք նախապատրաստեն հետագայում աշխարհում բջջային հեռախոսների էկրաններ և տեսախցիկներ արտադրող ամենախոշոր ընկերությունը դառնալու համար: Այս մասին հաղորդում է Bloomberg գործակալությունը:
Միասնական աշխատանքը պետք է լինի Japan Display-ի ստեղծման առաջին քայլը, որը մասնագիտանալու է սմարթֆոնների և պլանշետների համար հեղուկաբյուրեղային դիսփլեյներ ստեղծելու ուղղությամբ: Ակնկալվում է, որ ընկերությունը ստեղծվելու է 2012 թ-ի գարնանը: Պետական INCJ (Innovation Network Corp. of Japan) կորպորացիան նախագծի մեջ ներդնում է 2.6 մլրդ դոլար՝ դառնալով նախագծի 70% բաժնետերը:
Ճապոնական հսկաների համախմբումը կգերազանցի ներկայումս գոյություն ունեցող Sharp Corp.-ին, որը դիսփլեյներ է արտադրում խոշորագույն ընկերությունների համար: Ինչպես հայտնում է Blooomberg-ը, ֆինանսական տարվա ընթացքում, որն ավարտվել է մարտի 31-ին, Sony և Hitachi ընկերությունների հեղուկաբյուրեղային դիսփլեյներ արտադրող բաժինները լուրջ վնասներ են կրել:
