Մի քանի օր է, ինչ մի խումբ քաղաքացիների նախաձեռնությամբ սկսվել է «Բանակն առանց մարդասպանների» բողոքի ալիքը։ Վաղը մասնակիցները ՀՀ կառավարության շենքի մոտ սև հագուստներով սատարելու են այն մայրերին, ովքեր իրենց տղաների սպանության արդարադատությունը վերականգնելու համար ամեն հինգշաբթի կառավարության շենքի առջև են հավաքվում։ Ինչպես «Առաջին լրատվականը» տեղեկացավ նախաձեռնող խմբի անդամ Լալա Ասլիկյանից, բողոքի ալիքը առավել խորացավ բանակում արձանագրված սպանության վերջին դեպքից հետո։ Հիշեցնենք, որ օգոստոսի 26-ին «Եղնիկներ» զորամասում բռնի մահով զոհվել էր 18-ամյա երևանցի Աղասի Աբրահամյանը:
«Այս դեպքը միանգամից շատերին համախմբեց, որովհետև տղան առանձնակի դաժանորեն էր սպանվել։ Մենք ամեն հինգշաբթի կսատարենք տղաների մայրերին՝ պահանջելով արդարադատության վերականգնում»,- տեղեկացրեց Լալա Ասլիկյանը՝ ընդգծելով, որ հասարակությունը պետք է իրազեկ լինի սպանության դեպքերի մասին, քանի որ դրանք մտցվում են փակուղի և ընթացք չեն ստանում»,- մեկնաբանեց Լ.Ասլիկյանը։
Տեղեկացնենք, որ նախաձեռնությունն արդեն ունի 500-ից ավելի անդամ։ Լ. Ասլիկյանի փաստմամբ՝ շատերը, նույնիսկ չլինելով նախաձեռնության անդամ, որոշակի գործունեություն են ծավալում։ «Մենք վաղն ունենալու ենք պաստառներ, որոնց վրա գրված են լինելու մեր բոլոր պահանջները։ Այս նախաձեռնությունը դեռ նոր է, բոլոր իրականացվելիք միջոցառումները որոշված չեն, բայց մտադիր ենք ֆիլմ նկարահանել և երթ կազմակերպել»,- ասաց նախաձեռնության անդամը։
Տեղեկացնենք, որ Facebook սոցիալական ցանցում սա միակ նախաձեռնությունը չէ։ Կա նաև «Բանակն իրականում» խորագրով ակցիա, որի շրջանակում իրենց գործունեությունն են ծավալում «Բանակն առանց մարդասպանների» նախաձեռնության անդամները՝ տեղեկացնելով հասարակությանը ՀՀ բանակի անիրավությունների մասին։
