Ուկրաինայի նախկին վարչապետ Յուլիա Տիմոշենկոյի նկատմամբ դատական պրոցեսը ԵՄ մտնելու ճանապարհին արգելք է Կիևի համար: Այս մասին հայտարարել է Լեհաստանի նախագահ Բրոնիսլավ Կոմորովսկին լեհական TVP հեռուստաընկերությանը տված հարցազրույցի ժամանակ: «Լեհաստանը ոչ միայն Ուկրաինայի ընկերն է, այլ նաև լավ օրինակ է: Մենք կարողացել ենք անդամակցել ՆԱՏՕ-ին և ԵՄ-ին»,- ասել է Կոմորովսկին Ուկրաինայի նախագահ Վիկտոր Յանուկովիչի հետ հանդիպման ժամանակ:
Հանդիպումը տեղի է ունեցել երեքշաբթի օրը Բալթիկայի ափամերձ տարածքում: Կոմորովսկին շեշտել է Լեհաստանի դերը Ուկրաինայի՝ ԵՄ մտնելու հարցում, սակայն հայտարարել է, որ այդ ճանապարհին հայտնվել են խոչընդոտներ: «Այդ խոչընդոտներից մեկը Յուլիա Տիմոշենկոյի նկատմամբ դատավարությունն է, որը արևմտյան ԶԼՄ-ները մեկնաբանում են իբրև քաղաքական, այլ ոչ թե քրեական պրոցես»,- նշել է լեհ նախագահը:
TVP-ին տված հարցազրույցում Կոմորովսկին նշել է, թե Յանուկովիչին հայտնել է, որ արևմտյան պետությունները բացասական են գնահատում Տիմոշենկոյի հանդեպ սկսված դատավարությունը: Նրա խոսքերով՝ Ուկրաինան պետք է հերքի այն կարծիքը, թե սա «քաղաքական պրոցես է»:
