Օգոստոսի 26-ին ինն ամիս առաջ ԼՂ զորակոչված զինծառայող Աղասի Աբրահամյանը դաժանաբար սպանվել է: Նա արտագնա աշխատանքի էր մեկնել հորեղբոր մոտ Ռուսաստանի Դաշնություն և ինն ամիս առաջ վերադարձել էր հայկական բանակում ծառայելու համար: Հորեղբայրը պնդել էր չգնալ, մնալ աշխատելու և ընտանիքն էլ տեղափոխել, սակայն Աղասին համառել էր, որ իսկական տղամարդը պետք է ծառայի բանակում:
Մայրը՝ Սուսաննան, վերջին անգամ տղայի ձայնը լսել է մահից երկու օր առաջ, տղան խոստացել էր զանգել, փոխարենը երկու օր հետո զանգել էին տղայի մահվան լուրը հայտնելու, թե իբր հատապտուղ է կերել, թունավորվել, հետո, թե տղան էպիլեպսիա հիվանդությամբ է տառապել, ընկել է, և այլ անհեթեթ բացատրություններ: Սակայն արդեն պարզ է դատաբժշկական եզարակցությունը, ըստ որի՝ ուղեղի կենսական կարևորագույն ֆունկցիաների սուր խանգարում, փակ, բութ գանգուղեղային վնասվածք, արյունազեղումներ, քերծվածքներ, սալջարդ վերքեր գլխի, իրանի, վերջույթների շրջանում: Բացի այդ, դատաբժշկական քննությանը հարազատներից շատերն են ներկա գտնվել և նկարահանել մարմնի վրայի արյան հետքերը, հարվածները, կապտուկները, գլխուղեղին հասցված վնասները և այլն:
Տիկին Սուսաննան պատմում է, որ մինչ այս տղան երբեք չի բողոքել բանակից, ասել է, որ ամեն բան կարգին է, սակայն վերջին զանգի ժամանակ անտրամադիր է եղել, մորն ասել է՝ չքնի, սպասի իր զանգին, բայց էլ չի զանգել: «Ամեն անգամ ասում էր՝ մամ ջան, ամեն բան լավ է, լավ ղեկավարություն ունեմ, մի անգամ չի դժգոհել, հավատացեք, մի պաչկա սիգարետի գումար չեմ ծախսել իր համար: Իմ երեխային շատ առողջ ուղարկել եմ բանակ, անցել է բժշկական կոմիսիա, ես թուլամորթ ջահել չեմ ունեցել, շատ խելացի ու պինդ ջահել եմ ունեցել: Սա վայրագություն է, էս դեպքին բացատրություն չկա»,- հեկեկում էր մայրը: Սպայական կազմից չեն եկել, միայն Մարգարիտա Խաչատրյանն (Մորոզ) է եկել, օգնության ձեռք մեկնել ու գնացել:
Աղասի Աբրահամյանի հարազատներից շատերն են մասնակցել դիահերձմանը և մանրամասն նկարահանել են, թե ինչ կապտուկներ, արյան հետքեր, քերծվածքներ կան. «Երիկամների շրջանում հարվածներ, ականջը կտրված, տեսեք, դուք էլ նայեք՝ կտեսնեք, անգամ ձվարաններն էին կապտած: Տեսեք՝ նկարի միջի տղան նմա՞ն է դագաղում պառկածին… նրան գազանաբար մորթել են»,- ասաց Աղասու հորեղբայրը: Բարեկամներից մեկը բողոքում է, որ մյուս սպանված զինծառայողներին ինչ արեցին, որ այս մի գործին ընթացք տան, բա հայրենիքի զինվորին այսպե՞ս են պաշտպանում, և քանի դեռ չի բացահայտվել մի դեպք, այսպիսի դեպքերը բանակում դեռ կշարունակվեն: Ի դեպ, այսօր Աղասի Աբրահամյանի հուղարկավորման արարողությանը ներկա չէր որևէ սպա կամ ՊՆ որևէ ներկայացուցիչ: «Այսպես են հողին հանձնում իրենց զինվորին»,- ասում են հարազատները: Հարևաններից մեկն էլ նշեց, որ այսօր զինվորին տանում են ոչ թե հայրենիքին, այլ գեներալներին պաշտպանելու:
