Թուրքական Erzurumgazetesi թերթի փոխանցմամբ՝ Իգդիրում գործող և խիստ հակահայկական ուղղվածություն ունեցող, այսպես կոչված «Հայերի անհիմն պնդումների դեմ պայքարի միություն» (ASIM-DER) կազմակերպությունը դիմել է Անկարայում գտնվող Վրաստանի դեսպան Տարիել Լեբանիձեին՝ Թբիլիսիում «Անիրավությունների վրան» անվանմամբ իրենց մասնաճյուղը բացելու խնդրանքով։ Այս մասին հայտարարել է ASIM-DER-ի նախագահ Գյոքսել Գյուլբեյը։
Վերջինս Թբիլիսիում «Անիրավությունների վրան» բացելու անհրաժեշտությունը պայմանավորել է նրանով, որ Վրաստանի բնակիչներն իրազեկվեն 1915 թվականին «հայերի կողմից» թուրքերի սպանդի, զուլումի, կտտանքների մասին։
Գյուլբեյը նշել է, որ իրենք իրենց մասնաճյուղերը բացել են Թուրքիայի մի շարք վայրերում, և այժմ եկել է հարևան երկրների հերթը։ Ուշադրությունից դուրս չեն մնացել նաև եվրոպական երկրներն ու Ռուսաստանի կովկասյան հատվածը։
Հիշեցնենք, որ օգոստոսի սկզբին էլ ASİM-DER-ը դիմել էր Թուրքիայի ներքին գործերի նախարարության՝ կոչ անելով Թուրքիայից արտաքսել ապօրինի բնակվող հայերին. «Թուրքիայում ապօրինի բնակվող հայերն ու հայ զբոսաշրջիկներն ազատորեն շրջում են մեր երկրում։ Հանդիսանալով հասարակական կազմակերպություն՝ մենք անհանգստացած ենք նրանից, որ մեր երկրում ազատորեն շրջելուց և այն լքելուց հետո հայերը սկսում են զբաղվել թուրք ազգի ու պետության դեմ հակաքարոզչությամբ։
Հրանտ Դինքի սպանությանը հաջորդած ստամբուլյան ցույցերը, որոնց կարգախոսն էր՝ «Մենք բոլորս հայ ենք, մենք բոլորս Հրանտ ենք», ցույց տվեցին մեր երկրում ապօրինի բնակվող հայերի ստվար լինելը։ Հայ հարուստ գործարարներն իրենց հովանավորության տակ են վերցնում Թուրքիայում ապօրինի բնակվող հայերին։ Հայաստանի նախագահ Սերժ Սարգսյանն ամեն առիթով հակաթուրքական կոչեր է հնչեցնում»։
