Թուրքական Cumhuriyet թերթի փոխանցմամբ՝ ԵՄ ընդլայնման և եվրոպական հարևանության հարցերով եվրակոմիսար Շտեֆան Ֆյուլեն գոհունակությամբ է ընդունել օրեր առաջ թուրքական կառավարության ընդունած այն հրամանագիրը, որով նախատեսվում է 1936 թվականին երկրի ոչ մուսուլման փոքրամասնություններից խլված կրոնական ունեցվածքի վերադարձ։
Այս կապակցությամբ Ֆյուլեն հայտարարել է. «ԵՄ-ը ողջունում է ոչ մուսուլման փոքրամասնություններին պատկանող ունեցվածքի վերադարձման մասին Թուրքիայի կառավարության ընդունած որոշումը։ Այդ ամենը դրական է և գործնականում իր ներդրումն ունի երկրի կրոնական ազատություններին հարգանք ցուցաբերելու հարցում»։
Իսկ Թուրքիայի գծով Եվրախորհրդի զեկուցող Ռիա Օմեն-Ռույտենն իր հերթին նշել է, որ Թուրքիան ճիշտ ճանապարհին կարևոր քայլ է կատարել։
Հիշեցնենք, որ հուլիսի կեսերին Ֆյուլեն հայտարարել էր. «Թուրքիայում մուսուլման չհանդիսացող կրոնական համայնքները բախվում են մի շարք խնդիրների, Թուրքիան պետք է երաշխավորի կրոնական ազատությունները։ Միջնակարգ դպրոցներում շարունակում են պարտադիր մնալ կրոնական մշակույթի և էթիկայի դասերը։ Միսիոներներն ընկալվում են որպես տարածքային ամբողջականության ու մուսուլմանական կրոնին սպառնացող վտանգ։
Ալևիների ու ոչ մուսուլմանական կրոնական համայնքների հետ թուրքական կառավարության սկսած երկխոսությունը դեռևս որևէ կոնկրետ արդյունք չի տվել։ Թուրքիան՝ որպես ԵՄ-ին անդամակցել ցանկացող երկիր, պարտավոր է ապահովել իր բոլոր քաղաքացիների ազատ դավանանքը»։
