Грузия Online-ի փոխանցմամբ՝ Վրաստանի նախագահ Միխեիլ Սաակաշվիլին երեկ այցելել է Քութայիս, ուր հետևել է քաղաքի վերանորոգման ու վերականգնման աշխատանքներին։
Այս կապակցությամբ Սաակաշվիլին հայտարարել է. «Խորհրդարանի կառուցման գրաֆիկի հարցում մենք մի քանի շաբաթով առաջ ենք ընկել (Վրաստանի խորհրդարանն ամբողջովին Քութայիս կփոխադրվի 2012 թվականին կայանալիք խորհրդարանական ընտրություններից հետո.- 1in.am)։ Դա պատմական գործընթաց է, քանի որ այստեղ կառուցվում է ոչ միայն ժամանակակից շինություն, այլև գլխավորն այն է, որ տեղի է ունենում սոցիալական հոգեբանության փոփոխություն։
Քութայիսի համար դա նշանակում է 4-5 տարի շարունակվող անհույս իրավիճակի հաղթահարում։ Տեմպը, որով կառուցվում է Վրաստանը, չտեսնված է»:
Բացի այդ, Սաակաշվիլին Քութայիսում կատարել է հեծանվավազքի ուղու բացումը և իր կնոջ ու երեխաների հետ հաճույք ստացել հեծանիվ վարելուց. «Հեծանիվը եվրոպական և մարդու առողջ ապրելակերպի անբաժանելի մասն է։ Քութայիսը համարվում է ամենալավ Եվրոպան Եվրոպայում»։
Հիշեցնենք, որ մայիսի վերջին Միխեիլ Սաակաշվիլին հայտարարել էր, թե Թբիլիսին պետք է դառնա Եվրոպայի լավագույն մայրաքաղաքներից մեկը. «Այսօր մենք Թբիլիսիում ներդնում ենք ժամանակակից տրամվայ, որը չունի ո՛չ Բուդապեշտը, ո՛չ էլ Եվրոպայի որևէ այլ քաղաք: Մենք Թբիլիսի ենք բերում նաև էկոլոգիապես մաքուր այլ տրանսպորտ, ինչպիսն է, ասենք, հեծանիվը, որքան էլ դա ոմանց կարող է զավեշտալի թվալ»։