Աշտարակում մենք ունենք մի քանի հեկտար պետական հողատարածք, որը գոնե այդ մասով ֆինանսական առումով ծախսատար չի լինի, բայց այնպես չի, որ վերջնական հենց այդ վայրում է ստեղծվելու ակադեմիական քաղաքը: Այս մասին «Առաջին լրատվական»-ի հետ զրույցում նշեց ԱԺ «Քաղաքացիական պայմանագիր» խմբակցության պատգամավոր Սիսակ Գաբրիելյանը:
«Այստեղ միակ նորությունը Աշտարակի տեղի հետ էր կապված, մնացած մասերով ակադեմիական քաղաքի մասին և ՔՊ-ի նախընտրական ծրագրում կար, և քարոզարշավի ընթացքում բազմիցս խոսել ենք, որ մեր կրթական համակարգը իրական բարեփոխումների կարիք ունի: Նաև ակադեմիական քաղաքի մասով կար նաև կառավարության 5-ամյա ծրագրում»,-ասաց նա:
Սիսակ Գաբրիելյանը նկատեց, որ վարչապետը խոսել է ոչ թե 8 պետական բուհի, այլ մինչև 8 պետական բուհի մասին. «Կարող է լինել 3 բուհ, 4 բուհ կամ հենց 8 բուհ: Ես համաձայն եմ, որ այստեղ բավականին մեծ աշխատանք կա անելու, և որևէ մեկը չի էլ հայտարարել, որ 2023-ին կլինի այդ ամենը: Ես ուրախ եմ, որ կրթության փորձագետները սկսել են շատ ակտիվ իրենց հարցազրույցները, քննադատությունները, առաջարկները ներկայացնել»: