WikiLeaks-ը հրապարակել է Մարի Յովանովիչի նամակը Պետդեպին, որտեղ Հայաստանում նախկին դեսպանն անդրադաձել է Երևանի ավագանու վերջին ընտրություններին: Նամակը թվագրված է 2009 թ. հունիսի 4-ով: Յովանովիչը գրում է, որ հունիսի 1-ին ՀԱԿ-ի հանրահավաքի ժամանակ Լևոն Տեր-Պետրոսյանը քաղաքի ավագանու ընտրությունները որակել է որպես Հայաստանի պատմության մեջ ամենազզվելին: Ինչպես նշել է Լևոն Տեր-Պետրոսյանը, 100,000-150,000 երևանցիներ իրենց ձայնը վաճառել են Սերժ Սարգսյանի կուսակցությանը: Յովանովիչը նշում է նաև, որ Լևոն Տեր-Պետրոսյանը հայտարարել է, որ բոյկոտելու է ավագանիում իր ստացած 13 տեղերը: Նամակը նշում է, որ ՀՅԴ-ն ևս չի ընդունել ավագանու ընտրության արդյունքները, որոնց համաձայն կուսակցությունը ստացել էր 4,7%՝ չունենալով ոչ մի տեղ:
Մեկնաբանելով ընտրությունների արդյունքների շուրջ դժգոհությունները և դրանց վերլուծությունը՝ Մարի Յովանովիչը գրում է. «Լևոն Տեր-Պետրոսյանի դժգոհությունը բնական է, բայց ՀԱԿ-ի որոշումը՝ բոյկոտել նոր քաղաքային ավագանին, զարմանալի է: Հիմա, երբ ՀԱԿ-ը վերջապես հնարավորություն էր ստացել մտնելու կառավարության մեջ, ինչն այդքան ուզում էր, նա որոշել է դուրս մնալ: ՀԱԿ-ը սա անում է ի պատասխան կեղծված ընտրությունների, բայց մեր կարծիքով՝ սա վկայում է նաև Լևոն Տեր-Պետրոսյանի և իր համակիրների անլրջության մասին: Լ.Տեր-Պետրոսյանն անտարակույս շարունակում է մնալ իշխանությունների «աչքի փուշը», ռեժիմի փոփոխության հասարակայնորեն հնչեցրած նրա արդի նպատակն ընդամենրը նոսրացող ամբողջը գրգռելու փորձ է: ՀԱԿ-ը հնարավորություն ուներ կառուցողական դեր խաղալու՝ իր ներկայացուցիչներն ունենալով տեղական ինքնակառավարման համակարգում: Այդ հնարավորությունը նա, ցավոք, պարզապես չօգտագործեց»:
