Ադրբեջանում Իրանի դեսպան Սեյիդ Մուսավին, անդրադառնալով «3+3» (Իրան-Թուրքիա-Ռուսաստան և Հայաստան-Վրաստան-Ադրբեջան) տարածաշրջանային համագործակցության ձևաչափին նշել է. «Այս նախաձեռնությունը շատ հաջող էր։ Ակնկալում ենք, որ հաջորդ հանդիպումը տեղի կունենա մինչև տարեվերջ՝ արդեն Իրանում»։
Հիշեցնենք, որ «3+3» հարթակի առաջին հանդիպումը կայացել է դեկտեմբերի 10-ին՝ Մոսկվայում։ Հանդիպմանը, որին Հայաստանը ներկայացնում էր փոխարտգործնախարար Վահե Գևորգյանը, մասնակցել է 5 երկիր՝ Ռուսաստանը, Հայաստանը, Ադրբեջանը, Իրանը և Թուրքիան։ Վրաստանը հրաժարվել է մասնակցությունից։
Իրանահայ քաղաքական մեկնաբան, «Արաքս» շաբաթաթերթի գլխավոր խմբագիր Մովսես Քեշիշյանը գտնում է, որ Իրանը փորձում է տարածաշրջանում իր ներկայությունն ու ազդեցությունը հնարավորինս ապահովել․ «Մանավանդ, որ այստեղ Հայաստանն ու Ադրբեջանը թեժ հարաբերություններ ունեն ու դրանից բխող տարբեր հետևանքներ կարող են լինել, Իրանը չի կարող անմասն մնալ այդ ամենից։ Մանավանդ, այն ինչ վերաբերում է «Զանգեզուրի միջանցքին», միանշանակ Թեհրանի հետաքրքրությունների շարքում է»,-«Առաջին լրատվական»-ի հետ զրույցում ասաց նա։
Մեր զրուցակիցը նաև մեջբերեց ադրբեջանական «Թրենդ» գործակալությանը դեսպան Մուսավիի տված հարցազրույցն առ այն, որ Իրանը դեմ չէ «Զանգեզուրի միջանցքի» ստեղծմանը․ «Իհարկե հասկանում ենք, որ դա կարող է ադրբեջանական խաբկանք լինել, բայց այնուամենայնիվ դեռ պետք է սպասել արտգործնախարարության դիրքորոշմանը։ Իրանական մամուլը երբեք չի մեջբերել որևէ պաշտոնյայի խոսք, թե այդ միջանցքին Թեհրանը դեմ չէ։ Պարզապես նշել են, որ Իրանը կողմնակից է խաղաղ միջոցներով հասնել տարածաշրջանում կայունության ու խաղաղությանը, ճանապարհների բացմանը։ Այդ առումով ամենահարմար միջոցներից մեկը «3+3» ձևաչափի ստեղծումն է, հույսեր է կապում այդ ձևաչափի հետ ու նախատեսում, որ հաջորդ հանդիպումը հենց Թեհրանում լինի»։
Մեր զրուցակցի դիտարկմամբ՝ Հայաստանն ու Իրանն ունեն ընդհանուր շահեր և Երևանը կարող է հույս ունենալ, որ այդ ձևաչափում ունի բարեկամ երկիր․ «Թեև թվում է, որ Իրանը շատ դիպուկ ու կոշտ չի խոսում, այն առումով, որ չի ուզում իր հարաբերությունները Ռուսաստանի ու Ադրբեջանի հետ փչացնել, բայց այնուամենայնիվ Իրանը շատ լավ հասկանում է, որ Հայաստանի հետ հարաբերությունների պահպանումը Հայաստանի համար շատ կարևոր է։ Քաղաքական շահերի տեսանկյունից անհերքելի փաստ է, որ այդ հարաբերությունները պետք է պահպանվեն։ Մանավանդ պանթուրքական ծրագրերի հարցում, դուք հավանաբար հետևել ու տեսել եք, որ և՛ Ադրբեջանը և՛ Թուրքիան երբ խոսում են միջանցքի մասին, խոսում են այն համատեքստում, որ թուրքական աշխարհը կապվի իրար։ Դա ավելի շատ նեղացնող կամ հարվածող է Իրանին, քան Հայաստանին։ Վերջին հաշվով՝ եթե Հայաստանից կտրվում է մի փոքր մաս, ապա Իրանին ավելի երկարատև վտանգի առաջ է դնում․ դա պանթուրքական վտանգն է, որ խոստանում է Իրանի հյուսիսային ու հյուսիս-արևմտյան շրջանները պոկել։ Բնականաբար Իրանը դա չի կարող ընդունել ու պետք է ամեն ինչ անի դա կասեցնելու համար»,-ընդգծեց նա։
Խոսելով 3+3 ձևաչափի մասին, Քեշիշյանն ասաց, որ այն նախևառաջ մի փոքր կոմեդիայի ժանրից է․ «Որովհետև Վրաստանը մինչև հիմա չի մասնակցում՝ փաստորեն «2+3» է, բայց անընդհատ զոռում են «3+3»-ի վրա։Այնուամենայնիվ այն առաջ գնում է։ Կարևորն այն է, թե մենք մեր շահերից ելնելով ինչպես ենք հարաբերվում այս հարցի հետ։ Այսինքն՝ տեսեք, թե արևմուտքը և Ռուսաստանը մեզ ինչ են տալիս, որն է մեր շահը։ Եթե մենք մեր շահերի դիտանկյունից ենք հարցին նայում, ապա պետք է կարողանանք և՛ Ռուսաստանի հետ փորձենք գտնել ընդհանուր շահեր և՛ բնականաբար նաև Իրանի հետ։ Թեհրանի հետ արդեն ունենք անվտանգային շահեր, մանավանդ անվտանգային առումով։ Կարևոր է նաև արևմուտքի հետ հարաբերությունների զարգացումը։ Ոչ արևմուտքին պետք է մեր դեմ լարենք, ոչ էլ Ռուսաստանին։ Ես կարծում եմ, որ Հայաստանը պետք է օգտվի բոլոր հնարավոր միջոցներից ՝ հանուն իր շահերի, նպատակային քայլերի։ Կլինի դա «3+3»-ը, Հայաստան-արևմուտք, թե Հայաստան-Ռուսաստան հարաբերությունները , թե՛ նաև Հայաստան-Իրան հարաբերությունները։ Բնականաբար բոլոր երկրներն էլ ունեն իրենց շահերը, մենք պետք է փորձենք դրանք համադրել»,-եզրափակեց նա։