Հատիս լեռան պահպանության քաղաքացիական նախաձեռնության մասնակիցները հանդիպել են Հայաստանի Հանրապետությունում Նիդերլանդների Թագավորության արտակարգ և լիազոր դեսպան Նիկոլաաս Սխերմերսին:
Դեսպանին ներկայացվել են իրավական, մշակույթային, բնապահպանական, քաղաքաշինական և այլ խնդիրներ՝ կապված Հատիս լեռան ապօրինի օտարման և այնտեղ կատարված ապօրինի շինարարական աշխատանքների հետ։
Քննարկվել են նաև քաղաքացիական հասարակության, օրենքի գերակայության և իրավահավասարության դերը Հայստանում կայուն զարգացող Ժողովրդավարության և վստահելի ներդրումային միջավայրի ձևավորման հարցում։Թեմայի շուրջ «Առաջին լրատվական»-ը զրուցել է «ժողովրդավարական հարթակ» հիմնադրամի տնօրեն Գարեգին Միսկարյանի հետ, ով նշեց,որ մտադիր չէին դիմել միջազգային ատյաններ, մինչև չեղավ հերթական հանցագործությունը:
Միսկարյանը նաև տեղեկացրեց, որ Հատիսի հարցով վարձակալել են փաստաբան, որպեսզի բացահայտի ապօրինությունների շղթան․ «Այդ մարդիկ ոչ մի կերպ չեն ուզում կանգնել ու հասկանալ՝ ինչ են անում: Որոշեցինք դիմել միջազգային ատյաններին, որպեսզի տեղյակ լինեն՝ ինչ է կատարվում Հայաստանում: Սա ուղիղ սպառնալիք է Հայաստանում ժողովրդավարության ամրապնդմանը: Պատկան մարմինները ամեն կերպ փորձում են աջակցել Հատիսի ավերման գործընթացին, դադարեցնելու միակ միջոցը միջազգային ատյաններն են: Պատկան մարմինների աչքի առաջ հանցագործություն է, իսկ նրանք կոծկում են, զբաղված են աչքակապությամբ: Հատիսի գագաթին Քրիստոսի արձան չի կառուցվելու, դա հանցագործություն է»:
