Yerevan City խանութների ցանցում շարունակում են խախտումներ արձանագրել. այս մասին այսօր «Առաջին լրատվական»-ին տեղեկացրին սննդի անվտանգության պետական ծառայությունից՝ հավելելով, որ այս մոնիտորինգի արդյունքներն առավել ճշգրիտ հայտնի կլինեն օգոստոսի 31-ից հետո։
Տեղեկացնենք, որ մոնիտորինգն իրականացնելու որոշումը սննդի անվտանգության պետական ծառայությունը կայացրել էր այն բանից հետո, երբ քաղաքացի Տաթևիկ Ղարիբյանը, Yerevan City խանութներից մեկից ժամկետանց վարսակի շիլա գնելով, տեղեկացրել էր սննդի անվտանգության պետական ծառայությանը, որը, վարչապետի որոշմամբ, օգոստոսի 22-31-ը մոնիտորինգ սկսեց Yerevan City խանութների ցանցում։ Ինչպես ծառայությունից տեղեկացրին, իրականացվում է համալիր հետազոտություն. ստուգվում են փաստաթղթերը, սննդամթերքի ժամկետները, սերտիֆիկատները, հայերեն մակնիշումները։
«Արդյունքների մասին առայժմ վաղ է խոսել, դրանք կարող ենք հայտնել ամսի 31-ից հետո։ Այս պահի դրությամբ կարող եմ ասել, որ արդեն կան արձանագրված խախտումներ՝ կապված հայերեն մակնիշումների բացակայության հետ»,- ասաց սննդի անվտանգության պետական ծառայության տեղեկատվության և հասարակայնության հետ կապերի բաժնի աշխատակից Հայկ Մինասյանը։ Մեր հարցին՝ այլ սուպերմարկետներում իրականացվո՞ւմ են մոնիտորինգներ, թե՞ ոչ, Հ.Մինասյանը պատասխանեց, որ այլ մոնիտորինգներ չեն իրականացվում, քանի որ ստուգումներ իրականացնում են միայն դիմում-բողոքների հիման վրա։
«Մնացած խանութներում իրականացնում ենք մշտադիտարկումներ ծառայության պետի հրամանով, և եթե դրանց արդյունքում մտահոգող խնդիր է ի հայտ գալիս՝ ընթացք է տրվում»,- տեղեկացրեց Հ.Մինասյանը՝ հավելելով, որ այժմ մշտադիտարկումներ իրակացվում են մի շարք խանութներում: Անդրադառնալով Yerevan City-ի միջադեպին՝ նա տեղեկացրեց, որ այս դեպքում մեկ դիմումը բավարար եղավ մոնիտորինգ իրականացնելու համար՝ շեշտը դնելով այն ապրանքի վրա, որը բողոքի պատճառ է հանդիսացել:
«Սեպտեմբերի սկզբին հայտնի կլինեն ստուգումների արդյունքները, ըստ որի էլ կորոշվի, թե սուպերմարկետն ինչ տույժի պետք է ենթարկել՝ կախված խախտման լրջությունից»,- եզրափակեց Հ.Մինասյանը:
