Քաղաքացիական պայմանագիր խմբակցության պատգամավոր Արսեն Թորոսյանի՝ «Խաղաղության գինը» վերտառությամբ երեկվա գրառումը բուռն քննարկումների ու քննադատության պատճառ է դարձել համացանցում:
Հիշեցնենք, որ պատգամավորը ֆեյսբուքյան իր էջում գրել էր․ «Խաղաղությունն իրականում գին չունի, անգին է, ինչպես կյանքը։ Կյանքն անգին է։ Հակառակը պնդելը մահվան և պատերազմի քարոզ է։ Մահը երբեք ավելի թանկ չի կարող լինել, քան կյանքը, չնայած մեզ հարյուրամյակներով քարոզել են հակառակը․․․․․ Պետք է սթափվենք, ընդունենք որ սխալվել ենք։ Սխալվել ենք 100 տարի առաջ, երբ գետնի վրայի իրականությունը ստորադասեցինք եվրոպական քաղաքներում կնքված ինչ-որ փաստաթղթերի և նորից կորցրեցինք իրական հայրենիքի մի մասը։ Սխալվել ենք նաև 30 տարի առաջ, երբ քանդվող կայսրության հոգեվարքի ժամանակ կրկին ընտրեցինք մահն ու պատերազմը և «հաղթող» դարձանք, դարձանք ու հպարտությունից կուրացանք։ Կուրացանք՝ մեծից փոքր, ռամիկից մտավորական, սովորական քաղաքացուց մինչև իշխանավոր։ Ու մինչ օրս կույր ենք, չենք հասկանում ու ընդունում մեր սխալները, հրաժարվում ենք առերեսվել գետնի վրայի իրականության հետ ու շարունակում ընտրել մահը․․․․»: Թեմայի շուրջ «Առաջին լրատվական»-ը զրուցել է «Մարտական եղբայրություն» միաբանության անդամներ Մասիս Շիրոյանի, Հովսեփ Ղազարյանի և «Լեռք» ռազմակրթական հիմնադրամի տնօրեն / 44 -օրյա պատերազմի մասնակիցներ Արման Մխիթարյանի հետ:
Զրուցակիցները նշեցին, որ Արսեն Թորոսյանի գրառումը ընկալելի կլիներ, եթե մենք Ցեղասպանություն ու պատերազմ տեսած չլինեինք․ «Գետնի վրա իրականությունը այն է, որ թշնամական զորքը գտնվում է մեր տարածքում, ունենք գերիներ: Այս պայմաններում նման տոնայնությամբ խաղաղությունից խոսելը՝ հիմարություն է: Զինվորը հենց խաղաղության գինն է»: Զրուցակիցների խոսքով՝ Արսեն Թորոսյանը մի իշխանության մաս է, որը պատերազմել է և հիմա նա համարում է դա անիմաստ․ «Արսեն Թորոսյանը այս տեքստը կարող էր հրապարակել, երբ պատերազմից հետո հրաժարական ներկայացրած լիներ»:
