Հայաստանի վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հնարավոր է հանդիպեն: Ազգային ժողովում այդ մասին օրերս տեղեկացրեց ԱԺ արտաքին հարաբերությունների մշտական հանձնաժողովի նախագահ Էդուարդ Աղաջանյանը:
Նրա խոսքով, վերջին շրջանում բավականին ակտիվ գործունեություն է իրականացվում դիվանագիտական հատվածում, հանդիպումները բավականին հաճախ են ու տարբեր ձևաչափերով: Սակայն Աղաջանյանը, ի թիվ այլ հարցերի, անդրադարձել է նաև այդքան չարչրկված Զանգեզուրի միջանցքին։
Աղաջանյանը նշել է, թե Փաշինյանի և Ալիևի միջև Զանգեզուրի միջանցքի հարց չի քննարկվել, նման հարց չի լինելու։ Աղաջանյանն ասել է, թե Հայաստանը հրաժարվում է միջանցքի հարց քննարկել, առհասարակ։
Ուշագրավ մի լուր ևս, ԱՄՆ պետքարտուղար Էնթոնի Բլինքենը հուլիսի 25-ին հեռախոսազրույցներ է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ: Ընդ որում, դատելով հեռախոսազրույցների մասին Բլինքենի թվիթերյան էջում արված գրառումների ժամանակագրությունից, նախ եղել է Նիկոլ Փաշինյանի, հետո Իլհամ Ալիևի հետ հեռախոսազրույցը, թեև այդ հանգամանքը գուցե չունի էական նշանակություն: Միաժամանակ ուշադրության է արժանի այն, որ Բլինքենի թվիթերյան գրառումները նկատելիորեն տարբեր են: Օրինակ, Նիկոլ Փաշինյանի հետ հեռախոսազրույցի վերաբերյալ նրա գրառման մեջ նշվում է, որ «Լավ քննարկում է ունեցել Նիկոլ Փաշինյանի հետ՝ ռեգիոնում խաղաղության հասնելու Հայաստանի և Ադրբեջանի պատմական հնարավորության վերաբերյալ»:
Փաստորեն, չնայած առկա բոլոր տարածայնություններին ու խնդիրներին, Բաքուն, իբրև թե, ևս պատրաստվում է խաղաղության ու այդ ուղղությամբ ինչ ինչ ֆասադային քայլեր է անում։ Հայտնի դարձավ, որ ԱՄՆ պետքարտուղար Էնթոնի Ջ. Բլինքենի հետ հեռախոսազրույցում՝ գնահատելով հայ-ադրբեջանական գործընթացները, Ալիևը նաև հայտարարել է, թե Թբիլիսիում Ադրբեջանի և Հայաստանի արտգործնախարարների հանդիպումը գնահատել է որպես երկու երկրների միջև խաղաղության պայմանագրի շուրջ բանակցություններ սկսելու առաջին քայլ: Ալիևը պատմել է, որ Ադրբեջանն արդեն ձևավորել է խաղաղության պայմանագրի պատրաստման իր հանձնաժողովի կազմը և նման քայլ ակնկալում է Հայաստանից:
Արդյոք սա ադրբեջանական մեծ բլեֆի մի փոքրիկ մասնիկն է, թե Բաքվին խաղաղություն ևս անհրաժեշտ է։