Այժմ օրական մոտ 30 ուկրաինացի զինծառայող է մահանում ռազմաճակատում, մոտ 250-ը վիրավորվում են, հայտարարել է Ուկրաինայի նախագահ Վլադիմիր Զելենսկին The Wall Street Journal-ին տված հարցազրույցում։
Նախագահի խոսքով, մայիսին և հունիսին ընթացող մարտերի ամենաթեժ պահին Ուկրաինան օրական կորցնում էր 100-ից 200 զինծառայող. «Ես ձեզ հաստատ կարող եմ ասել, որովհետև ես ամեն օր դրանով եմ ապրում»:
Զելենսկին հրաժարվել է հրապարակել Ուկրաինայի ընդհանուր ռազմական կորուստները պատերազմի սկզբից ի վեր, սակայն նշել է, որ դրանք մի քանի անգամ ավելի ցածր են, քան Ռուսաստանինը։
Նախագահի խոսքով՝ Միացյալ Նահանգներից և դաշնակիցներից զենքի վերջին մատակարարումները օգնեցին կայունացնել իրավիճակը Դոնբասում: Այժմ Ուկրաինան կարող է օրական մոտ 6000 արկ արձակել, մինչդեռ Ռուսաստանը սկսում է զինամթերքի և զորքերի պակաս զգալ։
Զելենսկին նշել է, որ կրակային ուժերի հավասարակշռության այս փոփոխությունը նվազեցրել է ուկրաինական կորուստները։
Նախագահի խոսքով՝ Դոնբասում առաջնագծի կայունացումը Ուկրաինային թույլ կտա շարժվել այլ ուղղություններով։ Այնուամենայնիվ, նա հրաժարվել է քննարկել, թե որտեղ և երբ է Ուկրաինան նախատեսում հակահարձակում սկսել:
Զելենսկին նաև ընդգծել է, որ Ուկրաինային անհրաժեշտ են հակաօդային պաշտպանության համակարգեր՝ ուկրաինական քաղաքները ռուսական հրթիռներից պաշտպանելու համար։
Նրա խոսքով, այդ հակաօդային պաշտպանության համակարգերը շատ ավելի քիչ կարժենա ԱՄՆ-ին ու Եվրոպային, քան ուկրաինական տնտեսությունը ոտքի վրա պահելը՝ բյուջեի ամսական 5 մլրդ դոլարի դեֆիցիտով։
