Արդեն հայտնի է, որ Ռուսաստանի նախագահ Վլադիմիր Պուտինը Թեհրան կատարելիք այցի ընթացքում կհանդիպի Իրանի գերագույն առաջնորդ Ալի Խամենեիի հետ։ Այս մասին հայտնել է Պուտինի խոսնակ Պեսկովը՝ զրուցելով ՌԻԱ նովոստիի հետ։
Պեսկովն ասել է, թե Պուտինը Թեհրանում 3 հանդիպում ունի․ Իրանի նախագահ Ռայիսիի, Թուրքիայի նախագահ Էրդողանի հետ, և նախագահը կայցելի նաեւ Իրանի գերագույն կառավարիչ Ալի Խամենեիին։ Նրա խոսքով՝ Իրանը Ռուսաստանի բարեկամն ու գործընկերն է, և Մոսկվան շատ է գնահատում երկկողմ հարաբերությունները։ Պեսկովը նշել է, որ Իրանն ու Ռուսաստանը ժամանակի հետ կհեռանան համագործակցության մեջ դոլար օգտագործելու պրակտիկայից։ Նա պարզաբանել է, որ միայն այս տարվա առաջին չորս ամիսներին ապրանքաշրջանառությունն աճել է 31 տոկոսով՝ դա անվանելով դրական միտում։ Հասկանալի է, չէ՞ որ Պուտինը չի գնում Թեհրան զուտ տնտեսություն քննարկելու համար, թեպետ այս փուլում Մոսկվայի համար տնտեսականը ոչ պակաս օրհասական թեմա է։ Տարածաշրջանային այս երեք տերությունները պետք է պայմանավորվեն, թե ինչ տեսակ դասավորվածությունն է ունենալու ինչպես մերձավոր-արևելյան, այնպես էլ հարավ-կովկասյան ռեգիոնը։ Այս հանդիպումը կարևոր է ինչպես ազդեցության գոտիների բաժանման, այնպես էլ էներգակիրների առքի ու վաճառքի, Սիրիայում՝ այս երեք պետությունների ներկայության ձևաչափի կանխորոշման ու հետագա հարաբերությունների կառուցման մասով։ Ինչու՞ հետագա, որովհետև Ուկրաինական պատերազմը վաղ թե ուշ ավարտվելու է, աշխարհակարգն էլ՝ փոփոխվելու։ Այս փխրուն ու խրթին իրավիճակում Մոսկվան, Անկարան ու Թեհրանը կարիք ունեն հասկանալու ինչ համադրություններ ու հակասություններ ունեն՝ քայլեր անելիս միմյանց ոտքերը չտրորելու, բայց նաև արևի տակ արժանի տեղ ունենալու համար։ Այս և մյուս տարածաշրջանային սփռվածության հարցերը «Առաջին լրատվական»-ը քննարկել է քաղաքագետ Ալեքսանդր Մալաշենկոյի հետ:
