Վարչապետ Նիկոլ Փաշինյանն ընդունել է Ռուսաստանի Դաշնության արտաքին հետախուզության ծառայության տնօրեն Սերգեյ Նարիշկինին: Հետաքրքրական է, որ այցի մասին նախապես որևէ տեղեկություն չի տարածվել։
Պաշտոնական հաղորդագրության մեջ նշվում է, որ Նարիշկինի այցը ևս մեկ լավ հնարավորություն է քննարկելու հայ-ռուսական դաշնակցային հարաբերությունների օրակարգային հարցերը: Նիկոլ Փաշինյանն ընդգծել է, որ այս տարի նշվում է երկու երկրների միջև դիվանագիտական հարաբերությունների հաստատման 30-ամյա հոբելյանը և վստահություն հայտնել, որ համատեղ ջանքերով կհաջողվի փոխգործակցությունը դարձնել առավել արդյունավետ ու ամուր:
Սերգեյ Նարիշկինը շնորհակալություն է հայտնել ջերմ ընդունելության համար և նշել Հայաստանի և Ռուսաստանի միջև առկա բարձր մակարդակի քաղաքական երկխոսության փաստը, ինչը նպաստում է տարբեր ոլորտներում համագործակցության զարգացմանն ու ամրապնդմանը:
Զրուցակիցները քննարկել են միջազգային և տարածաշրջանային անվտանգությանը վերաբերող հարցեր: Անդրադարձ է կատարվել Հարավային Կովկասի տարածաշրջանում տեղի ունեցող գործընթացներին:
ՌԴ արտաքին հետախուզության ծառայության տնօրենի այցը Հայաստան ուշագրավ է մի քանի պատճառով։ Նախ՝ Նարիշկինի այցին նախորդել էր ԱՄՆ ԿՀՎ տնօրեն Ուլյամ Բըրնսի այցը Հայաստան։ Իսկ դրանից ավելի վաղ էլ ՀՀ ԱԽ քարտուղար Արմեն Գրիգորյանը հայտարարել էր արտաքին հետախուզական մարմին ստեղծելու մասին։
Քաղաքագետ Անդրիաս Ղուկասյանը համարում է, որ Հայաստանի շուրջ շպիոնական սկանդալ է հասունանում․ «Ես այս ամենը դիտարկում եմ ՌԴ նախագահ Վլադիմիր Պուտինի՝ Իրան կատարելիք այցի կոնտեքստում։ Սկզբում Հայաստան այցելեց Իրանի Անվտանգության խորհրդի քարտուղարը, հետո ԱՄՆ-ի ԿՀՎ տնօրենը։ Չի բացառվում, որ խոսքը գնում է այն հետախուզական ոլորտի գործունեության հետ, որի հետ կապված է Հայաստանը»,-«Առաջին լրատվական»-ի հետ զրույցում ասաց նա։
Ըստ Ղուկասյանի՝ Ռուսաստանը հետաքրքրված է Իրանի հետ ձեռք բերել բարիդրացիական հարաբերություններ, համոզել Իրանին Ուկրաիանայում պատերազմի հետ 300 ԱԹՍ ստանալ․ «Չի բացառվում, որ Ռուսաստանի Դաշնության ղեկավարությունը ներկայացնի Իրանին Հայաստանում ամերիկյան գործակալական ցանցը՝ ռեզիդենտուրան, որը հետախուզական աշխատանք է կատարում Իրանի դեմ։ Իրանն էլ պետք է պահանջի Հայաստանից, որ այդ հետախուզաական աշխատանքի իրականացումը Հայաստանում կասեցվի։ Հնարավոր է նաև, որ ԱՄՆ ԿՀՎ ղեկավարն այցելեց Հայաստան, որ այդ հարցը լուծի։ Չի բացառվում,որ ԱՄՆ-ն էլ իր կողմից պահանջեց, որ Ռուսաստանի Դաշնության գործակալական ցանցի գործունեությունը Հայաստանում դադարեցվի, որը գործում է Վրաստանի դեմ»։
Մեր զրուցակցի դիտարկմամբ՝ այս ամենի արդյունքում ՀՀ իշխանությունները կարող են հայտնվել ծանր որոշում կայացնելու ընտրության առջև։
Քաղաքագետ Ռոբերտ Ղևոնդյանը համարում է, որ Նարիշկինի այցի մասին նախապես չէր հայտարարվել, որովհետև այն նախապես ծրագրված չէր․ «Այցը մեծամասամբ կապված էր ԱՄՆ իր պաշտոնակցի այցի հետ։ Մեծ հավանականությամբ տեղի են ունենում խորքային գործընթացներ, որտեղ Հայաստանը լուրջ նշանակություն ունի։ Չասենք՝ դերակատարություն, որովհետև Հայաստանի սուբյեկտայնությունը ցածր է։ Բայց անկախ այն հանգամանքից, որ շատ հարցերում Հայաստանն ինքնուրույն որոշումներ չի կայացնում, դրանից նրա նշանակությունը չի նվազում»,-«Առաջին լրատվական»-ի հետ զրույցում ասաց նա։
Ղևոնդյանը մատնանշեց նաև Իրանի բարձրաստիճան պաշտոնյաների այցը Հայաստան և ընդգծեց, որ այս ամենը պետք է դիտարկենք աշխարհաքաղաքական նոր վերադասավորումների պրիզմայով․ «Հավանաբար կան խնդիրներ, որոնք ճշգրտելու անհրաժեշտություն ունեն»,-եզրափակեց մեր զրուցակիցը։