Խումբը ներկայում զբաղված է երրորդ ձայնասկավառակի վերջին երկու երգերի ձայնագրման աշխատանքներով: Հետո կմնա տեխնիկական խնդիրների կարգավորումը՝ ձայնասկավառակի արտադրության պատրաստումը: Այս մասին այսօր «Առաջին լրատվականի» հետ զրույցում տեղեկացրեց Empyray խմբի հիմնադիր անդամ, երգիչ Սարգիս Մանուկյանը: Նա նաև տեղեկացրեց, որ խմբում կա փոփոխություն՝ Լևոն Ավետիսյանն այսուհետ նվագելու է հարվածային գործիքների վրա:
Նրա խոսքով՝ այս ամսվա վերջին կնշակակվի խմբի մենահամերգի օրը, որը կկայանա հոկտեմբերի վերջին կամ նոյեմբերի սկզբին: «Այդ օրը կնշվի նաև ձայնասկավառակի շնորհանդեսը, քանի որ մենք միշտ փորձել ենք համատեղել դրանք: Առանձին միջոցառում անելը մեզ համար հեշտ չէ»,- իր խոսքում նշեց երգիչը՝ ավելացնելով, որ կա համերգային դահլիճի խնդիր, բայց ամենայն հավանականությամբ այն կկայանա Սունդուկյանի անվան ազգային ակադեմիական թատրոնում, որի դահլիճի ակուստիկան լավն է:
«Հաճելի կլիներ համերգն անցկացնել Մարզահամերգային համալիրի համերգային դահլիճում, սակայն խոսքը մեծ ֆինանսների մասին է, իսկ քանի որ մեր խմբի համերգը կոմերցիոն նպատակ չի հետապնդում, մեզ համար դժվար է պոտենցիալ հովանավորների մեջ մի այնպիսի մարդու գտնել, որը փող կտա ռոք խմբին, որովհետև նրանք ուրիշ բան են սիրում կամ ուրիշ բանի համար են փող տալիս»,- նշեց Ս. Մանուկյանը՝ հավելելով, թե փորձեր, այնուամենայնիվ, կլինեն:
Նա տեղեկացրեց, որ մինչ մենահամերգը կաշխատեն նոր ձայնասկավառակից նկարահանել մեկ, գուցե նաև երկու տեսահոլովակ: «Առաջին տեսահոլովակը կնկարահանվի «Օրորոցային» ակուստիկ բալլադի հիման վրա, երկրորդը՝ «Մեկընդմիշտ» երգի հիման վրա: «Օրորոցային»-ը արդեն կարելի է լսել ռադիոյով: Աշխատում ենք, որ նոր երգեր չհայտնվեն եթերում, որպեսզի ձայնասկավառակը սպասված լինի»,- հայտնեց Ս. Մանուկյանը՝ տեղեկացնելով, որ նոր ձայնասկավառակում որոշ փոփոխություններ արվել են, սակայն դրանք ինքնանպատակ չեն երաժշտական նյութի, կատարողականի ու հնչողության առումով:
Հարցին՝ ինչպե՞ս է կոչվելու ձայնասկավառակը, երգիչն ասաց, թե առայժմ պարզ չէ, քանի որ ձայնասկավառակի անվանումը որոշվում է միայն վերջին պահին:
«Նոր ձայնասկավառակում մենք մեզ չենք դավաճանել: Այն, ինչ բնականի մեջ է, փորձել ենք անել»,- հայտնեց երաժիշտը՝ ուրախությամբ նշելով, որ սեպտեմբերի սկզբից կգործեն նաև խմբի արդեն նորացված կայքերը՝ Empyray.am-ն ու Empyray.com-ը:
