ԱՄՆ նախագահի ազգային անվտանգության հարցերի խորհրդական Ջեյք Սալիվանը հայտարարել է, որ Սպիտակ տունը կարծում է, թե Ռուսաստանն Իրանից խնդրել է մոտ հարյոուր անօդաչու, այդ թվում հարվածային: Ըստ Սալիվանի, իրենք կարծում են, որ Իրանն արդեն հուլիսին կսկսի ռուս մասնագետների ուսուցանումը՝ անօդաչուների կառավարման համար: ԱՄՆ նախագահի խորհրդականի հայտարարությունը նախորդում է նախագահ Բայդենի մերձավորարևելյան այցին, որի ընթացքում Բայդենը նախատեսում է լինել Իսրայելում, Պաղեստինում, ինչպես նաև Սաուդյան Արաբիայում: ԱՄՆ նախագահն ունի մի քանի նպատակ, որոնց թվում առանցքային են դիտվում արաբ-իսրայելական հարաբերության կայունության և կարգավորման հարցերը, նավթի համաշխարհային գների կառավարումը և գնաճի զսպումը, ինչպես նաև Ռուսաստանի հանդեպ Սաուդյան Արաբիայի ու ընդհանրապես արաբական երկրների վերաբերմունքի փոփոխությունը:
Անկասկած է, որ այցի օրակարգում հիմնարար է լինելու նաև Իրանի հարցը, միջուկային ծրագրի հեռանկարի համատեքստում: ԱՄՆ նախագահի մերձավորարևելյան այցի օրակարգը անշուշտ կլինի շատ ավելի ընդգրկուն, քանի որ հարցերը իրապես շատ-շատ են: Մի բան թերևս աներկբա է, որ այդ այցը մեծ նշանակություն կունենա ոչ միայն այդ ռեգիոնում իրավիճակի հետագա զարգացման համար, այդ թվում ի դեպ նաև Սիրիայի հյուսիսում թուրքական ռազմական հնարավոր գործողությունների, այլ նաև իր ազդեցությունը կունենա կովկասյան իրողությունների տրամաբանության վրա, թեկուզ օրինակ նույն Իրանի հարցի համատեքստում: Այդ առումով բոլորովին պատահական չէ, որ Բայդենի ռեգիոնալ այցից առաջ Սպիտակ տունը փաստացի մեղադրանք է հնչեցնում Իրանի ուղղությամբ, որ Թեհրանը «սնուցում» է Ուկրաինայի դեմ ՌԴ ռազմական հատուկ գործողությունը, դե ֆակտո՝ պատերազմը: Ի՞նչ է այդ հայտարարությունը, դեղին քա՞րտ Իրանին: Ընդ որում, այստեղ թերևս ուշադրության է արժանի և այն, որ ՌԴ արտգործնախարար Լավրովի իրանյան այցին ընդառաջ, որ տեղի ունեցավ հուլիսի 22-ին, ԱՄՆ պետքարտուղարի տեղակալ Կարեն Դոնֆրիդը Երևանում հայտարարեց, որ Վաշինգտոնը պատրաստ է Մինսկի խմբի համանախագահության շրջանակում աշխատել ՌԴ հետ՝ չնայած Ուկրաինայում պատերազմին: Այդ հայտարարության տողատակում անկասկած կար նաև «Իրանի ականջի» հաշվարկը, ինչը թերևս պետք է առաջացներ որոշակի անվստահություն Թեհրանի մոտ՝ ԱՄՆ հետ հարաբերության առումով Մոսկվայի հնարավոր ստվերային մտադրությունների մասին, այդ կերպ թերևս ազդելով Լավրովի իրանյան բանակցային արդյունավետության հնարավորության վրա:
Ներկայումս Վաշինգտոնը ավելի կոշտացնում է հաղորդագրությունը և փաստացի զգուշացնում Իրանին, որ ՌԴ հետ ավելի սերտ աշխատանքը կարող է բերել խնդիրների: Իսկ խնդիրներ կարող է առաջացնել Իսրայելը, որը լինելու է Բայդենի առաջին կանգառը և որը շատ վաղուց է հիբրիդային հարվածներ հասցնում Իրանին և խոսում անգամ առավել բաց գործողությունների պատրաստակամության մասին, եթե Թեհրանը չգնա միջուկային համաձայնության վերականգնման և անցնի միջուկային սպառազինություն ունենալու այսպես ասած «անշրջելիության կետը»: Ինչ կարձագանքի Թեհրանը Բայդենի ռեգիոնալ այցից առաջ իր հասցեին արված ակնարկին:
