Երևանի քաղաքապետ Հրաչյա Սարգսյանը Ֆրանսիա այցի շրջանակում հանդիպել է Ֆրանսիայի խոշորագույն՝ Իլ դե Ֆրանս շրջանային խորհրդի նախագահ Վալերի Պեկրեսի հետ: Հանդիպմանը քննարկվել է Երևանի քաղաքային կառավարման հարցում Իլ Դե Ֆրանսի հետ գործակցության, տարբեր աջակցության ծրագրերի հնարավորության մասին: Վալերի Պեկրեսը Ֆրանսիայի նախագահի թեկնածու էր, որի հաջողության հավանականությունը փոքր չէր, թեև նրան չհաջողվեց անցնել երկրորդ փուլ: Պեկրեսը լինելով նախագահի՝ Հանրապետական կուսակցության թեկնածու, նախորդ տարի աշնանն այց կատարեց Հայաստան: Ընդ որում, այդ այցի առանձնահատուկ ուշադրության արժանի հանգամանքը այն եղավ, որ դրա ընթացքում Վալերի Պեկրեսը այցելեց նաև Արցախ, ինչի մասին իհարկե տեղեկություն հրապարակվեց այն բանից հետո, երբ Պեկրեսն արդեն վերադարձել էր Ֆրանսիա: Ի դեպ, այդ առնչությամբ «հոխորտաց» նաև Իլհամ Ալիևը, դժգոհելով Պեկրեսի այցից, այդ թվում դժգոհելով, որ ռուս խաղաղապահները, նույնն է թե Ռուսաստանը թույլ է տվել նրա մուտքն Արցախ առանց Բաքվի հետ համաձայնեցնելու, ու նաև ազդարարեց, թե՝ եթե իմանային նա Արցախում է, կփակեին հետդարձի ճանապարհը: Ֆրանսիան ի դեպ արտգործնախարարության մակարդակով իր դժգոհությունը հայտնեց Ադրբեջանի նախագահի այդօրինակ արտահայտությունների համար, թեև բանն իհարկե չհասավ ֆրանս-ադրբեջանական գժտության կամ լարման:
Արդյո՞ք Պեկրեսի հետաքրքրությունը Հայաստանի, Արցախի ու հայկական խնդիրների հանդեպ լոկ նախընտրական էր: Երևանի քաղաքապետի հետ հանդիպումը խոսում է այն մասին, որ հետաքրքրությունն ըստ ամենայնի պայմանավորված է ավելի լայն գործոններով, իհարկե թե քաղաքական, թե անշուշտ մարդկային: Բոլոր դեպքերում, այն հայ-ֆրանսիական աշխատանքի հիմք է:Մեզանում այդ աշխատանքը գերազանցապես դիտարկվում է քաղաքական բարձր մակարդակների, մասշտաբների, վերամբարձ թեմաների «պրիզմայով»: Մինչդեռ, երկկողմ աշխատանքի հարցում թերևս առավել առարկայական մակարդակ է տեղային հարաբերությունների ձևավորումը, ինչի առումով Երևան-Իլ Դե Ֆրանսի շրջան գործակցության ձևավորումը և այն կոնկրետ ծրագրերի վերածելը կարող է շատ ավելի շոշափելի, այսպես ասած գետնի վրա ամուր կանգնած էֆեկտ ունենան հայ-ֆրանսիական երկկողմ կապի խորացման համար, քան վերամբարձ քաղաքական կատեգորիաները: Հայաստան-Ֆրանսիա հարաբերությունն այդ առումով ունի շոշափելի ներուժ և պետք է կենտրոնանալ այդ ներուժի «կապիտալիզացիայի» խնդրի վրա, թեկուզ հենց այն հայ-ֆրանսիական տնտեսական գործակցության ճանապարհային քարտեզի շրջանակում, որը երկու երկրների արտգործնախարարությունները ստորագրեցին 2021 թվականի աշնանը, և որը դարձավ փաստորեն 2022-ի գարնանը նախագահ Մակրոնի և վարչապետ Փաշինյանի մասնակցությամբ Փարիզում տեղի ունեցած հայ-ֆրանսիական գործակցության համաժողովի բացման հիմք: