«Global Startup Ecosystem Index-2022»-ի միջազգային վարկանիշում Երևանը կովկասյան քաղաքների շարքում զբաղեցրել է առաջին տեղը։
StartupBlink-ը ամեն տարի դասակարգում է ստարտափ էկոհամակարգերը՝ հիմնվելով ախարհի ավելի քան 1000 քաղաքների, 2000 համատեղ աշխատանքային տարածքների և 70000 ստարտափերի տվյալների բազայի վրա: Հաշվի են առնվում այնպիսի պարամետրեր, ինչպիսիք են նորարար ընկերությունների որակն ու քանակը, նորարարական ենթակառուցվածքային օբյեկտները, ներդրումների ծավալը։
Զեկույցի համաձայն՝ Երևանի ստարտափ էկոհամակարգը լավագույնն է Կովկասում՝ այս ցուցանիշով երկու անգամ առաջ անցնելով Թբիլիսիից։ Երևանը 38 տեղով բարձրացել է 1000 քաղաքների ցանկում՝ զբաղեցնելով 244-րդ տեղը։
«Առաջին լրատվական»-ի հետ զրույցում մեդիափորձագետ Սամվել Մարտիրոսյանն ասում է, որ չնայած դիրքերը լավացրել ենք, սակայն դեռ շատ ցածր ենք առաջատար քաղաքներից, մեր առաջատարոթյունը մեր տարածաշրջանում է։ Հատկանշական է, որ վերջին ամիսներին Հայաստան տեղափոխվող բիզնեսների համար այս ոլորտում փոքր ստարտափների համար գրանցումն ու հարկային բեռի հարցը հեշտացվել է, որն օգնում է լավ ու կայուն դիրքերի գրավման հարցում։
Աճը պայմանավորված է նաև այլ ցուցանիշներով՝ ինտերնետի հասանելիությունը, տարածքներ վարձելու հնարավորությունը, սակայն սրա կողքին կան բազմաթիվ խնդիրներ, որոնք մեզ հեռու են պահում իդեալական վիճակից․ դա կրթական համակարգն է և դրա շուրջ ձևավորված էկոհամակարգը, դա նաև սահմանադրությունն է, հնարավոր վեճերի դեպքում դատական համակարգի վատ վիճակը, որն էլ հիմնականում հեռու է պահում լուրջ ներդրողներին, որովհետև նրանք կասկածում են, որ որևէ խնդրի դեպքում կկարողանան լուծման հասնել։ Երբ տեղական բնակչությունը չի վստահում իր դատարանին, արտասահմանյան ներդրողները ևս նույնն է անում։ Այս լուրջ խնդիրներն են, որոնք մեզ հեռու են պահում առաջին տասնյակից։
