Այս պահին բավականին պասիվ է միջազգային հանրությունը արձագանքների առումով, որը միգուցե պայմանավորված է գլոբալ զարգացումներով, մասնավորապես, միջազգային հանրության ուշադրությունը կենտրոնացած է ուկրաինական կոնֆլիկտին, սակայն կարծում եմ՝ եթե հայկական կողմը պրոակտիվ գտնվի, մենք դեռևս կարող ենք միջազգային գործընկերների ճնշման ներքո ռազմագերիների հետ կապված խնդիրները լուծել: Այս մասին «Առաջին լրատվական»-ի հետ զրույցում նշեց ՄԻԵԴ-ում հայ ռազմագերիների շահերի ներկայացուցիչ Սիրանուշ Սահակյանը:
Նրա խոսքով, Եվրոպայի Խորհրդի գլխավոր քարտուղար Մարիա Պեյչինովիչ Բուրիչը
ԵԽ-ի շրջանակներում ունի մեծ ազդեցություն և բավականին լայնմանդատ և իր ներգրավվածությամբ կարող են ԵԽ-ում ընդունվել Ադրբեջանին դատապարտող, նաև ինչու ոչ, ազատ արձակման կոչեր պարունակող փաստաթղթեր,. «Մենք ունենք պրակտիկա, երբ ԵԽ-ն պատժամիջոցներ է կիրառում մարդու իրվունքների խախտումների համար: Քանի որ ռազմագերիների հետ կապված խախտումները տևական են, և մասշտաբային, ես կարծում եմ, որ դատապարտող կոչերից զատ պետք է նաև իրական, գործնական քայլեր ձեռնարկեն, և քննարկեն պատժամիջոցների կիրառման հարցը: Դրա իրավական և քաղաքական հնարավորությունները այս կառույցն ունի, մնում է դիվանագիտական, քաղաքական աշխատանքի միջոցով սերտացնել հարաբերությունները և հասնել արդյունքի»,-ասաց Սիրանուշ Սահակյանը:
Դիտարկմանը, որ արդեն երկար ժամանակ է, որևէ ռազմագերի չի վերադարձվել, նա նա ասաց. «Քանի որ քաղաքական օրակարգի հարցերը հստակեցվել, հանրայնացվել են և բոլորիս համար տեսանելի է երկխոսությունը հայ-ադրբեջանական կողմերի միջև, տարաբնույթ դերակատարների միջնորդությամբ, հաստատված է, որ հայ-ադրբեջանակն հարաբերություններում քաղաքական բնույթի չլուծված հարցեր, որոնք քննարկումների փուլում են: Ես կարծում եմ՝ ադրբեջանական կողմը հայ ռազմագերիներին պահում է որպես պատանդներ, որպեսզի ստանա քաղաքական պահանջների բավարարում: Նա ստեղծել է արհեստական կապ քաղաքական օրակարգի և ռազմագերիների վերադարձի միջև: Քանի դեռ քաղաքական հարցերում չի արձանագրվել դրական տեղաշարժ, Հայաստանի կողմից տեսանելի զիջումներ, ես չեմ կարծում, որ նրանք ազատ արձակում կապահովեն: Շատ ցավալի է, որ մարդասիրական խնդիրների լուծումը կախվածության մեջ է դրվել քաղաքական խնդիրներից»: