Այսօր քաղաքապետարանի հանրակրթության վարչության պետ Գայանե Սողոմոնյանը ներկայացրել է սեպտեմբերի 1-ին ընդառաջ՝ դպրոցում սպասվող բոլոր փոփոխություններն ու բարեփոխումները: Նրա խոսքերով` կրթության ոլորտում բարեփոխումներն անշրջելի են, և այդ բարեփոխումների արդյունքում վերապատրաստվել և ուսումնական հաստատության ղեկավարման իրավունք է ստացել Երևանի քաղաքապետարանի 154 դպրոցների տնօրեններ, հավաստագիր չեն ստացել 7-ը, չեն վերապատրաստվել 19-ը:
65 տարին լրանալու կապակցությամբ տնօրենի պաշտոնից զրկվել են 52, 70, 88, 129 դպրոցի տնօրենները, իսկ երկու տնօրեն` 56 և145-ինը, ազատվել են իրենց դիմումի համաձայն: Արդեն սեպտեմբերի առաջին օրերից կսկսվի ուսուցիչների ատեստավորման կարգը, կսահմանվեն տարակարգեր և ըստ տարբեր տարակարգերի` ուսուցիչները կստանա տարբեր աշխատավարձեր:
Գայանե Սողոմոնյանի խոսքերով` մի փոքր խնդիր է առաջացել՝ 6-րդ դասարանի ռուսաց լեզվի և հանարհաշվի դասագրքերի հետ կապված, բայց մինչև սեպտեմբերի 10-ն այս հարցն էլ կլուծվի:
Բացի այդ, այս տարի դպրոցում նոր առարկա է մտնում` շախմատը, որը կդասավանդվի 2-4-րդ դասարաններում`երկու դասաժամերով: «Առարկայի պահանջներից մեկն էլ դպրոցներում առանձնացված դասարաններ ունենալն է, Շախմատի ակադեմայի ջանքերով բոլոր դպրոցները կստանան շախմատներ, բոլոր դպրոցներում արդեն շախմատի ուսուցիչներ կան»,- ասաց Գայանե Սողոմոնյանը:
Բացի այդ, 161 մանկապարտեզներից 32 մանկապարտեզ ծնողների դիմումների համարձայն՝ երկարօրյա կունենան` մինչև ժամը 19:00-ը: Դպրոցում դասերը կսկսվեն ժամը 8:30-ին, մանկապարտեզներում՝ նույնպես, բայց մի տարբերությամբ, որ այստեղ կարող են երեխաները գալ մինչև 10:30-ը՝ ըստ անհրաժեշտության, ոչ թե՝ ըստ քմահաճույքի:
Բուհերում դասերը կսկսվեն 9:30-ին: Ժամային փոփոխությունները կապված են քաղաքապետարանի՝ տրանսպորտի բեռնաթափման ծրագրի հետ, ինչի փորձը մայիս ամսին արդեն եղել է:
Հարցին`շախմատին այդքան մեծ ուշադրություն է դարձվել, իսկ օրինակ Հայ եկեղեցու պատմություն առարկան սիրողական մակարդակով է դասավանդվում, արդյո՞ք դա Սերժ Սարգսյանի գործոնով է պայմանավորված, Գայանե Սողոմոնյանը պատասխանեց.«Ես չեմ ուզում տպավորություն ստեղծվի, որ դպրոցում շախմատ առարկայի հիմքը նախագահի գործոնով է պայմանավորված, պայմանավորված է նաև նրանով, որ նաև ՀՀ նախագահն է շատ կարևորում շախմատ առարկայի մուտքը դպրոց և նաև շախմատի նկատմամբ մեր ազգի ունեցած հաղթանակներն են»: Նա նաև ավելացրեց, որ շախմատ խաղացող երեխայի տրամաբանությունն այլ է:
Անդրադառնալով Հայ եկեղեցու պատմություն առարկային` Գայանե Սողոմոնյանը նշեց, որ արդեն մի քանի տարի է՝ այս առարկան դասավանդվում է դպրոցներում և երկու տարի շարունակ Քրիստոնեական դաստիարակության կենտրոնի և Կրթության ազգային ինստիտուտի կողմից վերապատրատստվել են. «Այսօր վստահ ասում եմ, որ մայրաքաղաքում չկա դպրոց, որտեղ դասավանդող ուսուցիչը չունենա վկայագիր, մայրաքաղաքի մասով ես դա բացառում եմ»:
