Հայաստանի հավաքականի և Դոնեցկի «Շախտյոր»-ի կիսապաշտպան Հենրիկ Մխիթարյանն իր կարծիքն է հայտնել Չեմպիոնների լիգայի խմբային փուլի վիճակահանության վերբերյալ: Այս մասին տեղեկացնում է «Հանքափորներ»-ի պաշտոնական կայքը:
-Հենրի՛կ, հետևե՞լ ես վիճակահանությանը:
-Այո, այո, մարզումից հետո:
-Ի՞նչ սպասելիքներ ունեիր վիճակահանությունից, և որքանով դրանք արդարացան:
-Չի կարելի ասել, որ ցանկանում էինք կոնկրետ ինչ-որ մեկի հետ հանդիպել: Վիճակահանության արդյունքը չի կարելի կանխորոշել:
-Ի՞նչ կասես խմբի մասին:
-Լավ խումբ է, անցանելի: Ամեն ինչ պետք է անենք, որ յուրաքանչյուր խաղում հաղթենք: Նվազագույնը՝ պարտավոր ենք կրկնել նախորդ տարվա արդյունքը` դուրս գալ «փլեյ-օֆ»: Հետո արդեն կմտածենք:
-Առաջին զամբյուղից բաժին հասավ «Պորտու»-ն, ամենաբարդ տարբերակը չէ՞ր:
-Թիմերը հենց այնպես չեն հայտնվում Չեմպիոնների լիգայում: Այս մրցաշարին մասնակցող բոլոր թիմերն էլ արժանի են դրան: «Պորտու»-ն հաստատ նվեր չէ: Մեզ բաժին են ընկել 3 ուժեղ թիմեր: Բոլորը ցանկանում են խմբից դուրս գալ և որքան հնարավոր է առաջ գնալ:
-Հենրի՛կ, ինչի՞ հաշվին կարելի է հաղթել «Զենիթ»-ին:
-Կարծում եմ` Միստերը (Միրչա Լուչեսկու) կասի` ինչպես խաղալ նրանց հետ` հաղթանակի հասնելու համար:
Հիշեցնենք, որ երեկ Մոնակոյում տեղի ունեցած Չեմպիոնների լիգայի խմբային փուլի վիճակահանության արդյունքում «Շախտյոր»-ը հայտնվեց G խմբում, որտեղ կմրցի պորտուգալական «Պորտու»-ի, ռուսական «Զենիթ»-ի և Կիպրոսի «Հապոել»-ի հետ:
