Թուրքական Doğan լրատվական գործակալության փոխանցմամբ՝ Թուրքիայում ԱՄՆ դեսպան Ֆրենսիս Ռիկարդոնեն իր կնոջ հետ այցելել է Մուղլայի նահանգի Բոդրում շրջան՝ ներկա գտնվելու Rock’n Roll-ի համերգին։ Սակայն երկու թուրքեր սկսել են բողոքել նրա դեմ:
Նրանք բացականչել են «Հեռացի՛ր քո երկիրը, յանկի», «Մերձավոր Արևելքի մարդասպան ԱՄՆ-ի ներկայացուցիչ», «Թուրքիան առանց մարդասպանների»։ Ցուցարարները փորձել են մոտենալ Ռիկարդոնեին, սակայն նրա թիկնապահներն ու ոստիկանները կանխել են դա՝ ձերբակալելով նրանց։
Հիշեցնենք, որ ներկայումս ԱՄՆ սենատում քննարկվում է Թուրքիայում ԱՄՆ դեսպանի պաշտոնում Ռիկարդոնեի հաստատման հարցը։ 2010 թվականի դեկտեմբերի 30-ին ԱՄՆ նախագահ Բարաք Օբաման, օգտվելով իր սահմանադրական իրավունքից և նրանից, որ Կոնգրեսը գտնվում է արձակուրդում, Ֆրենսիս Ռիկիարդոնեին նշանակեց Թուրքիայում ԱՄՆ դեսպանի պաշտոնում, որը ամիսներ շարունակ թափուր էր:
Դրանից առաջ Ֆրենսիս Ռիկարդոնեն չէր կարողացել ստանալ ԱՄՆ սենատի հավանությունը՝ այդ պաշտոնում նշանակվելու համար, քանի որ նրա թեկնածությունն արգելափակել էր ակնառու հանրապետական սենատոր Սեմ Բրաունբաքը: