«Սեւանա լճի շրջակա միջավայրի պաշտպանություն» (EU4Sevan) ծրագրի շրջանակներում Գեղարքունիքի մարզպետարանում կայացել է աշխատաժողով՝ «Անասնապահության կայուն կառավարումը Սեւանա լճի շրջակա միջավայրի բարելավման նպատակով» թեմայով: Ինչպես տեղեկացրին Գեղարքունիքի մարզպետարանի գյուղատնտեսության եւ բնապահպանության վարչությունից, աշխատաժողովին մասնակցել են ՀՀ շրջակա միջավայրի եւ էկոնոմիկայի նախարարների տեղակալաներ, ներկայացուցիչներ ԵՄ-ից, ՀՀ Ազգային ագրարային համալսարանից,Գեղարքունիքի մարզպետարանից, մարզի համայնքապետարաններից, բնակավայրերից, հասարակական կազմակերպություններից, շահագրգիռ այլ կազմակերպություններից, ֆերմերային տնտեսություններից։
Աշխատաժողովի ընթացքում քննարկվել են Սեւանի լճավազանում գոմաղբի մշակման ներուժին, Սեւանի լճավազանում գոմաղբի կայուն կառավարման համար ծախսարդյունավետ տեխնոլոգիական լուծումներ մշակելուն վերաբերող թեմաներ, ներկայացվել է «Վերականգնողական գյուղատնտեսություն» հայեցակարգը:
Աշխատաժողովի նպատակն էր՝ ներկայացնել «Գոմաղբի եւ կաթնամթերքի թափոնների հարակայուն կառավարման փորձնական ծրագիր Գեղարքունիքի մարզում» համակողմանի ուսումնասիրության արդյուքները եւ քննարկել հաջորդող քայլերի վերաբերյալ մշակված առաջարկությունները:
Աշխատաժողովից հետո Գեղարքունիքի մարզպետ Կարեն Սարգսյանն ընդունել է Հայաստանում ԵՄ ներկայացուցիչ Անդրեա Բաջիոլիին ու «ECOServe» ծրագրի թիմի ղեկավար, ԳՄՀԸ Քրիստիան Հենշելին։ Հյուրերը շնորհակալություն են հայտնել Գեղարքունիքի մարզպետին՝ այս կարեւոր աշխատաժողովի կազմակերպմանն ու անցկացմանը աջակցելու համար։ Մարզպետի հետ ունեցած զրույցի ընթացքում նրանք անդրադարձել են «ECOServe» ծրագրի շրջանակներում մարզում նախատեսվող ծրագրերին եւ ակնկալվող արդյունքներին, նշելով, որ դրանք կարող են իրենց դրական լուրջ ներգործությունը ունենալ նաեւ հեռավոր եւ սահմանամերձ բնակավայրերի տնտեսությունների համար։
«ECOServe» ծրագիրը համատեղ ֆինանսավորվում է Եվրոպական Միության եւ Գերմանիայի Դաշնային Հանրապետության տնտեսական համագործակցության եւ զարգացման նախարարությու կողմից։
Գեղարքունիքի մարզպետ Կարեն Սարգսյանն էլ իր հերթին շնորհակալություն է հայտնել համագործակցության համար, նշելով, որ բոլոր ծրագրերն էլ իրենց իրականացմամբ շատ մեծ նշանակություն կարող են ունենալ մարզի տնտեսությունների համար։
